1 युहान्नाले याङ येशुयि लोब्टु मा सुन्दु राङ बप्तिस्मा तेरिन धुलो नाङान फरिसिबे थोइसोङ। 2 तेम्बा तेला येशु खुरि ता माना, हिन्नाङ ख्युइ लोब्टुतेबे बप्तिस्मा तेरिनलो 3 तेहि येशुयि धि थोइरे, खि यहुदिया ताङदे याङ गालिलला लक्ते पुइसोङ। 4 खि सामरिया लाम च्युङदे ढोकोइ च्युङदेलो

5 खि सामरियायि सुखार नाङान भजारने लेप्सोङ हति भजारते याकुब खुरि पिजा योसेफला पिपिना सायि धुनला धुलो।✝ 6 हतिया याकुबयि ठोम्पा धुलो। येशु हुनहुन थाङछ्याते हति ठोम्पि धुनला ङाला सोइ सोङ। हा:लाम ङिम्मुइ भेला च्युङदुलो।

7 सामरिया पोमुवा झि छ्यु घाङदु हतिया लेप्सोङ। येशुयि हतिला नाइसोङ, "ङाला छ्यु थुङदु छ्यु।" 8 ख्युइ लोब्टुतेबा भजारला सायाप ङ्योरु पुइसोङ।

9 तेहि सामरि पोमुवायि खोला नाइसोङ, "ख्योए युहुदि क्याइरे ङा समरियायि लाने छ्यु च्हिरु क्याइरे थुङज्याइ?" यहुदिबे समरिया ङ्याबो च्याङ नाता मिभोरा।✝ 10 येशुयि हतिला नाइसोङ, "ख्युइ कजसुबे च्यिनलाब राङ ख्योएला छ्यु लोङान मिला ङोस्येस्येबा हिन्ना ख्युइ खोला लोङान ना, राङ ख्युइ ख्योएला सोम्बो छ्यु तेरङान ना।" 11 हति पोमुवायि खोला नाइसोङ, "प्रभु, ख्योएला छ्यु धोनयापयि नोचे मेताइ, राङ ठोम्पि याङ तिङरिङमुवा दु। तेहि ख्योए काने सोम्बो छ्यु ख्योङ ज्याइ? 12 च्हि ख्योए ङाहि ताङबुइ याकुबले छेया हिनाइ? ख्युइ ङेला धि ठोम्पा सोइ सोङ, राङ खो खुरि, ख्युइ मि राङ ख्युइ पालाङतेबे धि ठोम्पि छ्यु राङ त्हुरेलो।"

13 येशुयि हतिला जवाक पिन्सोङ, "धि छ्यु थुङान पोरो याङ खाकोमङान ना, 14 हिन्नाङ सुइ ङाहि पिपिनि छ्यु थुङिन हति जब याङ खामि कोमा। काङ छ्यु ङा खोला तेर च्याइ, हति हतिला नामयाङ मिसिनयापयि मिजेयि चाला छ्यु भेलङानयि क्याकपा होङान ना!"

15 हति पोमुयि खोला नाइसोङ, "प्रभु, ङाला हति छ्यु राङ नाङ, राङ तेहि ङा खा कोमङान माना ना, राङ तेहि ङेला छ्यु घाङदु होङकोइ याङ मिहा।" 16 येशुयि हतिला नाइसोङ, "कु, ख्युइ ख्योबोला सअ नोइ।" 17 हति पोमुयि नाइसोङ, "ङाहि ख्योबो मेता।" येशुयि हतिला नाइसोङ, "ख्युइ ख्योबो मेता नाइरे ख्युइ तेम्बा नाइसोङ, 18 चिचालानाना ख्युइ ख्योबो ङा थाबा च्युङ छारतु, राङ सु थाल्ला ख्योए ङ्याबो दु, हति ख्युइ ख्योबो माना। ख्युइ धि तेम्बा नानाइबा ना।"

19 हति पोमुयि खोला नाइसोङ, "हजुर, ख्योए ङोन्सेखिलङान हिना नाइरे ङाला छ्या होतो। 20 ङाहि ताङबुइ मि धि सुरला कजसुबायि पुजा क्याइरे, तेहि खे यहुदि नेन्दु, आराधाना किसि सा यरुश्लेमने नेन्दु।"

21 येशुयि हतिला नाइसोङ, "ए पोमु ङाला हिछे कि, हति भेला हुन राङ दु, जब खे न त धि सुरला, न यरुश्लेमला आकि आराधाना किकोइ हुन।"

22 खे समरिया काङ आराधाना किन खि हा:मिकुवा। ङे च्हि आराधाना किन ङेला छ्या होतो चिचालानाना मुक्तिते यहुदिबाने हुन। 23 हिन्नाङ भेला हुन राङ दु, राङ हति भेला थाल्ला राङ ना, जब तेम्बा आराधाना किङानबे आकेला आत्मा राङ तेम्बाला आरा किङान ना। चिचालानाना आराधाना किङान च्वरा आराधाना किङानला आके फाकिनलो। 24 कजसुबा आत्मा ना, राङ खोला आराधाना किङानतेबे आत्मा राङ तेम्बा ला आराधाना किकोइ हुन। 25 हति पोमुयि खोला नाइसोङ, "ङाला छ्या होतो, कि थारथोनदु झ्युङान हुन काङला ख्रिष्ट नेन, राङ जब खो हुन, हतितुइना ङेला ताम पोरो नेन।" 26 येशुयि हतिला नाइसोङ, "ख्योए ङ्याबो ताम नाङान, ङा हति राङ ना।" 27 हतितुइना राङ ख्युइ लोब्टुतेबा लेप्सोङ, राङ खो पोमु झि ङ्याबो ताम नाङान थोङसोङ हा:लाइरेलो हिन्नाङ "ख्योए ल च्हि कोयिन?" अर्थात "ख्योए धि पोमु ङ्याबो चिचाला ताम नेन?" नाइरे सुइ याङ मा टिसोङ।

28 तेहि हति पोमु घारि पोरते भजार यहला पुइसोङ, राङ मि तेबाला नाइसोङ, 29 "सअ, मि झिला तेहि, सुइ ङाहि क्याक्याइबि लाइ पोरो ङाला नाइसोङ। हति राङ ख्रिष्ट हिनोम?" 30 तेहि हतिबा भजारने थोन्दे येशुयि तेहा पुइसोङ। 31 हति उइला लोब्टुबे खोला जु नाइरे स्युवा* क्यापसोङ, "गुरुज्यु, चिगा सो।" 32 हिन्नाङ ख्युइ हतिबाला नाइसोङ, "ङाला सायापयि चाला धि च्वरा ङ्योपा होतो, काङते खेला छ्या मेता।" 33 हतिचाला लोब्टुतेबे चिकि च्हि नारे क्याइसोङ, "च्हि रेनयि खोला ङ्योपा ख्योँरे पिनोम का कि च्हिरु?"

34 येशुयि हतिबाला नाइसोङ, "ङाला चोँङानयि धोप्पा च्वरा कि, राङ ख्युइ लाइ पुरा कियाप राङ ङाहि ङ्योपा ना। 35 च्हि खे मिनाइ, तरह धा सि लाँमा दु, तेहि भालि तुइयापयि भेला हुन? ङा खेला नाज्याइ, रेँ मि तेक्ते स्यिङ राङ भारि तोइ, भालि तुइयापला भालि छोहि छारतु। 36 सुइ भालि तुकिन हतिला ला खुकिन, नामयाङ मिसिनयापयि मिजेयि चाला ढेबु रुकिन, राङ जु ङान राङ तुइङान ङाहि कार ङ्याबो किप्पो किनलो। 37 चिचालानाना ‘चिकि झुयिन, राङ स्यानति तुबिनलो,’ नाङानयि वचन धिला राङ तेम्बा हुन। 38 ङाहि ख्योएला हतिया तुप्तु चाँरे, काँहा तुका क्याक्याइबा मेता। स्यान तेबे तुका क्याक्याइबा होतो, राङ खि तुका क्याक्याइबि ढेबु खेराङला खुदु।"✝

39 "ङाहि च्हि क्याइ हति पोरो ख्युइ नाइसोङ हति पोमुवायि साछि क्याइरे हति भजारयि सामरितेबे नाङने लेइराङयि ख्युइ थोला हिछे क्याइसोङ।" 40 हतिचाला जब सामरि ख्युइ तेहा लेप्ते, हतितुइना हतिबे खोला खोङ ङ्याबो त्योएयापयि स्युवा क्यापतु, राङ येशु ङिन ङा खोङ ङ्याबो तातेलो।

41 तेहि ख्युइ वचनयि चाला तरह याङ लेइराङयि ख्हुइ थोला हिछे क्याइसोङ। 42 हति पोमुला हतिबे नाइसोङ, "ता ख्युइ नानाइबि तामयि चाला ङाहि हिछे क्याक्याइबा माना हिन्नाङ ङे ङिरि थोथोइबि चाला तेम्बारे खो संसारयि मुक्तिदाता हिना नाइरे ङाहि हा:कोसोङ।"

43 ङिन ङाहि च्येला येशु हतिने थोन्दे गालिलला पुइसोङ। 44 येशु खुरि साछि पिन्सोङ, कि रेँ अल देशला ङोन्सेखिलङानला सम्मान राङ मिदु नाइरे✝ 45 जब खो गालिलला लेप्ते, तेहि ख्युइ यरुश्लेमला निस्तार कालापसोलयि भेलाला च्हि क्याक्याइबा होतो हति पोरो लाइ थोङसोङ गालिलयि मितेबे ल क्याइरे सअ नाइरेलो चिचालानाना हतिबा हाङ कालापसोलला पुइसोङ।

46 हतिच्येला येशु गालिलयि काना भजारला लेप्सोङ, काँहा ख्युइ छ्युला आरा स्यिरेलो। कफर्नहुमला घोबा आङकिङान झि धुलो, सुइ पिजा नाप्पा धुलो। 47 येशु यहुदियाने गालिलला लेप्तुना थोइरे खो ख्युइ तेहा लेप्सोङ, तेहि ख्युइ पिजा टाक्तु छ्यु नाइरे स्युवा क्यापसोङ चिचालानाना ख्युइ पिजा स्यिलेके धुलो। 48 येशुयि खोला नाइसोङ, "खे शक्ति राङ हा:लाइयापयि लाइ माक्याइ थु हिछे राङ मिकिता।"✝ 49 हति घोबा आङकिङानति खोला नाइसोङ, "प्रभु, ङाहि पिजा स्यियापले ताङला ङा ङ्याबो सअ।" 50 येशुयि खोला नाइसोङ, "क्यु, ख्युइ पिजा सोम्बो दु।" येशुयि नानाइबि धि वचनला ख्युइ हिछे क्याइसोङ, राङ खुरि लाम स्युसोङ। 51 तेहि खो लामला ढुन ताताताला ख्युइ यक्पुवातेबा खोला ठाते ख्युइ पिजा सोम्बो दु नाइरे खोला स्येसोङ। 52 चोम भेलाने खो टाकाला छेलसुइ नाइरे टिरे हतिबे नाइसोङ, "धाङ ङिम्मुइ एक भजेने खोला छायोएयि ताङसोङ।" 53 येशुयि हतिला, "ख्युइ पिजा सोनङान ना" नेतुइने राङ हिना नाइरे आकि हा:कोरेलो। तेहि खो राङ ख्युइ प्येरा पोरोयि हिछे क्याइसोङ। 54 यहुदियाने गालिलला लेप्ते येशुयि क्याक्याइबि हा:लाइयापयि लाइ लाम्मा ङिबा हिना।