1 धि तामयि च्येला येशु गालिल, मदलभ तिबेरियास छो छियि फारकानला पुइसोङ। 2 तेहि तुम छोम्मुवा झि ख्युइ च्येला लेप्सोङ चिचालानाना ख्युइ नाप्पातेबाला क्याक्याइबि हा:लाइयापयि लाइतेबा हतिबे थोङसोङ। 3 येशु स्हुरयि थोला पुइसोङ, राङ खुरि लोब्टुबा ङ्याबो त्येसोङ। 4 यहुदिबे कालापसोङ, निस्तार-कालापसोलयि भेला धुनला धुलो, 5 तेहि येशुयि फालाछुला ताइरे तुम छोम्मुवा झि खो यहला होङान थोङसोङ ख्युइ फिलिपला नाइसोङ, "धिबाला स्योमयापयि चाला हु काने लोटा ङ्योज्याइ?" 6 ख्युइ खोला छोए तायापयि चाला धि नानाइबा ना, चिचालानाना को च्हि कितु पुते, सो खोला छ्या होतो।

7 फिलिपयि खोला नाइसोङ, "पोरोला टिझिटिझि खुनाङ ङाहि ङुलयि सिक्कि क्या लोटा हतिबाला छाँमिदु।" 8 ख्युइ लोब्टुबे नाङने च्हि सिमोन पत्रुसयि भाइ अन्‍द्रियासयि नाइसोङ, 9 "ङ्या पिजा झि दु, हतिला जौकायि लोटा ङा राङ ङ्या ङाहि दु। हिन्नाङ झोम मि चाला झोबा झि कि काँहा छाङिन?"

10 येशुयि नाइसोङ, "मितेबाला तोतुछ्‌यु।" हतिया चा लेइराङ क्येक्येबि थाङ धुलो। तेहि तोङ ङा थाबा पिजा हतिया त्येसोङ। 11 तेहि येशुयि लोटा खेरसोङ, राङ कजसुबा ला कटिनक्याँ नाइरे च्येला त्योएङान तेबाला कोहििसोङ, हतिच्वरा क्याइरे ङ्या याङ कोहििसोङ। हतिबाला चोम कोइबा होए होचोम पिन्सोङ। 12 तेहि ख्होए ढ्हाढ्हा थु साइ सोङ ख्युइ खुरि लोब्टुतेबाला नाइसोङ, "ला मा लुलुइबि तुबुतेबा तुइ, चियाङ मासहि होङदु माजु।" 13 साङानतेबे लालाकि जौका हति लोटा ङाहि तुभुइ हतिबे तुरे ख्योए फुगो च्युनङि खाँसोङ। 14 हतिचाला ख्युइ क्याक्याइबि धि हा:लाइयापयि लाइतेबा थोङसोङ मितेबे नाइसोङ, "संसारला होङान ङोन्सेखिलङान तेम्बारे खो राङ हिना।"✝ 15 हतिबा लेप्ते खोला बलजफति ङ्याबो क्यालबो सोज्याइ फाकिन्दु नाइरे हा:कोरे येशु याङ चिक्पा सुरला पुइसोङ।

16 कमु च्युङदे येशु लोब्टुतेबा छो यहला पुइसोङ। 17 राङ डुङगाला स्योन्दे हतिबा छो छोम्मुवा फारकानला कफर्नहुम यहला ढुवाला छेलसोङ। हतितुइना स्योरुपलेके धुलो, राङ येशु थल्ला थु ख्होए तेहा लेलेबा मेतालो। 18 तेहि हुरबो छोम्मुवा क्याक्याबाति, छो छोम्मुवायि भाल्लाप क्याकाला छेलसोङ। 19 ङा ट्हु किलोमिटर डुङगा चलाइ क्याइरे पुते हतिबे येशु छो छोम्मुवायि थोला काङबि डुङगायि धुनला होङान थोङसोङ, तेहि हतिबा झिसोङ। 20 हिन्नाङ ख्युइ हतिबाला नाइसोङ, "ङ्याना माझि।" 21 हतिबे खोला क्येन राङ ङ्याबो डुङगाला पोरसोङ, राङ हतिबा ढुन ताताति साला डुङगा लेप छारसोङ।

22 छो छोम्मुवायि फारकान ला होएता मि झोम ति थाहि टो तेला हतिया डुङगा झि मात्रा थोङसोङ। हतिबाला छ्या होतो, कि येशु खुरि लोब्टुबा ङ्याबो डुङगाला स्योस्योना मेता नाइरे हिन्नाङ खुरि लोब्टुबा मात्रा पुते नाइरे। 23 तेहि तिबेरियासने स्यान डुङगा तेबा हति साला लेप्सोङ, का प्रभुयि कटिन क्या नाइरे हतिबे लोटा सासायिबा तेहा। 24 येशु राङ ख्युइ लोब्टुबा हतिया मेता छ्या च्युङदे हतिबा येशुला फाकिन डुङगाला स्योन्दे कफर्नहुम पुइसोङ।

25 ख्होए येशुला छो छोम्मुवा यि फारकानला ठाते खोला टिरेलो, "गुरुज्यु, ख्योए ङिहा जब लेप्ते?" 26 येशुयि हतिबाला जवाक तेरिन ताङ नाइसोङ, "तेम्बारे ङा खेला नाज्याइ, खि हा:लाइयापयि लाइतेबा थोङसोङ माना हिन्नाङ ढ्हाढ्हा थु लोटा सासाइबि चाला ङाला फातु लेलेबाना। 27 मासि होङान यि ङ्योपि चाला तुका माके, हिन्नाङ नामयाङ मिसिनयापयि मिजे तु त्योएङानयि ङ्योपायि चाला तुका कि, काङते मि पिजि खेला तेरङान ना। चिचालानाना कजसुबा आकि ख्युइ थोला छाप च्याच्यारा होतो।"

28 हतिबे खोला नाइसोङ, "कजसुबे धोप्पा होएते लाइ किच्याइला ङाहि च्हि कि कोइ हुन?" 29 येशुयि हतिबाला नाइसोङ, "कजसुबे लाइ हति राङना सुला ख्युइ चाँचाँबा होतो हतिला खे हिछे कि।" 30 हतिचाला हतिबे खोला नाइसोङ, "ख्योए काङ हा:लाइयापयि लाइ तोनिन्दु, सो ङे ताज्याइ, तेहि ख्योएला हिछे किता? ख्योए च्हि किच्याइ?✝ 31 ङाहि ताङबुइ मि च्याङ मेते साला मन्न साइरेलो, पवित्रशास्त्रला धि च्वरा नाइरे टिदु, ‘ख्युइ हतिबाला सायापला तेङलाने लोटा पिन्सोङ।’" 32 येशुयि हतिबाला नाइसोङ, "तेम्बारे, ङा खेला नाज्याइ, खेला तेङलाने लोटा तेरङान मोशा माना हिन्नाङ तेङलाने खेला तेम्बा लोटा तेरङान ङाहि आके ना। 33 चिचालानाना कजसुबे लोटा हति राङना, काङते तेङलाने हुन राङ, संसारला मिजे तेरिन।"

34 हतिबे येशु नाइसोङ, "प्रभु, हति लोटा ङेला बारतै नाङ।" 35 येशुयि हतिबाला नाइसोङ, "मिजेयि लोटा ङ्याना। ङाहि तेहा होङान टोपा मितोबा, राङ ङाहि थोला हिछे किङान नामयाङ खा मिकोमा। 36 हिन्नाङ ङाहि खेला नानाइबा राङ होए, खि ङाला थोथोवा होतो, राङ हिछे मिकिता। 37 आकि ङाला पिपिना पोरो ङाहि तेहा होङान ना, राङ ङाहि तेहा होङान च्यिलाङ ङा मासि मिसो। 38 ङा ङारि धोप्पा पुरा कितु ङा तेङलाने लेलेबा माना हिन्नाङ ङाला चोँङानयि धोप्पा पुरा कितु लेलेबाना। 39 तेहि ङाला चोँङान यि धोप्पा धि ना, कि ख्युइ ङाला पिपिनि नाङने सुलाङ ङाहि ढोरु झ्युयाप माना, हिन्नाङ खेला सिनि ङिन सोम्बो सोइरे लोङयापयि चाला। 40 चिचालानाना ङाहि आकि धोप्पा धिना, कि पिजाला ताङानला राङ ख्युइ थोला हिछे किङान पोरोला नामयाङ मिसिनयापयि मिजे होङ राङ, राङ ङा हतिला सिनि ङिन सोम्बो सोज्याइ।"

41 यहुदिबा येशुयि विरोधला नाला छेलसोङ चिचालानाना ख्युइ नाइसोङ, "तेङलाने पुपुबि लोटा ङा राङना।" 42 हतिबे नाइसोङ, "च्हि धि योसेफयि पिजा, येशु मानाइ? ख्युइ आके राङ आमाला हुइ ङोमिस्येबाइ च्हि? थाल्ला धि च्हिरु ‘ङा तेङलाने लेप्ते’ नाइरे नेन्दु?"

43 येशुयि हतिबाला जवाक पिन्सोङ, "खे खिरि नाङला स्युताम नारे माके। 44 ङाला चोँङानयि आकि मा टुइना सुइ याङ ङाहि तिया होङ मिङ्युइबा, राङ ङा हतिला सिनि ङिन सोम्बो सोज्याइ। 45 ‘तेहि हति पोरो कजसुबाने लोपङान ना नाइरे’ ङोन्सेखिलङानयि किताबला टिटिबा दु। पोरो सुइ आकेने ङ्यानिन राङ स्येयिन हति ङाहि तेहा हुन।✝ 46 आकेला मि सुइ याङ थोथोवा मेता मात्रा हति थोथोवा मेता। सुइ कजसुबाने लेलेबा होतो, हति राङ आकेला थोथोवा होतो। 47 तेम्बारे ङा खेला नाज्याइ, सुइ हिछे क्याइ हतिला नामयाङ मिसिनयापयि मिजे होतो। 48 ङा मिजेयि लोटा ना। 49 खि ताङबुइ कानाने साथुवाला मन्न साइरे हाङ स्यिरे पुइसोङ। 50 हिन्नाङ तेङलाने पापते होङानयि लोटा धि राङ ना, सुइ हति साइ हति मिस्यिया। 51 तेङलाने पापाबि सोम्बो लोटा ङा राङ ना। सुइ धि लोटा साइ हति बारतै मिसिया तोकिन। राङ काङ लोटा ङा संसारयि मिजेयि चाला तेरच्याइ, हतिते ङाहि स्हु ना।"

52 तेहि यहुदिबा ख्होरे नाङला नारे किताला छेलसोङ, "धि मि च्हिरु क्याइरे खुरि स्हु हुला सारु जु ङ्युइकिन?" 53 येशुयि हतिबाला नाइसोङ, "तेम्बारे, ङा खेला नाज्याइ, खि मि पिजि स्हु मासाइना, राङ ख्युइ ठा मातुना, खेला मिजे मिहा।" 54 ङाहि स्हु साङान राङ ङाहि ठा थुङान ला नामयाङ मिसिनयापयि मिजे दु, राङ सिनि ङिन हतिला सोम्बो सोज्याइ। 55 चिचालानाना ङाहि स्हु तेम्बारे सायापयि क्यु ना, राङ ङाहि ठा तेम्बारे थुङयाप यि क्यु ना। 56 ङाहि स्हु साङान राङ, ङाहि ठा थुङान ङाहि तेहा तोकिन, राङ ङा हतिला तोकिन। 57 च्हिरु क्याइरे सोम्बो आकि ङाला चाँरे, राङ ङा आकि चाला सोम्बो होतो, हति च्वरा क्याइरे ङाला साङान याङ ङाहि क्याइरे सोम्बो लुइङान ना। 58 "तेङलाने लेलेबि धि लोटा धि च्वरा माना काङते ताङबुइ काने साइनाङ स्यिरे पुते। धि लोटा साङान ते बारतै सोम्बो त्योएङान ना।" 59 ख्युइ धि ताम कफर्नहुम यहुदि झोमसि खिमला छोइ लोबितुइना नाइरेलो।

60 धि ताम थोइरे ख्युइ लोब्टु लेइराङ नाङने नाइसोङ, "धि वचन काबोदु, सुइ धि ङयान ङ्युइकिनाइ?" 61 हिन्नाङ ख्युइ लोब्टुतेबा भारेला ख्होरे नाङला नारे किन्दु नाइरे हा:कोरे येशुयि हतिबाला नाइसोङ, "च्हि धि ताम खि चाला पारछ्ये हुन दुये? 62 खि मि पिजा ताङला खो काँहा होए हतिने पुपकिन ताताता थोङसोङ कि च्हिरु? 63 मिजे तेरङान कजसुबायि आत्मा ना, स्हुने च्याङ मिहा। काङ वचन ङाहि खेला नाइरे, हति कजसुबायि आत्मा राङ मिजे ना। 64 हिन्नाङ खि नाङने चोम होतो, सुइ हिछे मि किता" चिचालानाना खोला हिछे मि किङान सुगासुगा ना, राङ खोला धोका तेरङान सु हुन नारे येशुला ताङलाने राङ छ्या होतो। 65 येशुयि नाइसोङ, "हति चाला ङाहि नानाइबा होए आकि आङ मा पिनथु सुयाङ ङा होएसा ना होङ मिङ्युइबा।" 66 हतिच्येला ख्युइ लोब्टु लेइराङ क्यापला पुइसोङ राङ खो ङ्याबो टालटियाप ताङदेलो। 67 येशुयि लोब्टु च्युनङिगारला नाइरेलो, "च्हि खे याङ ङाला तादे ढोज्ये?" 68 सिमोन पत्रुसयि जवाक पिन्देलो, "हे प्रभु, ङे सुइ तेहा ढोज्याइ? ख्योए ङ्याबो नामयाङ मिसिनयापयि मिजेयि वचन दु।✝ 69 राङ ङाहि हिछे क्याक्याइबा होतो राङ ङोस्येस्येबा होतो, ख्योए कजसुबे पवित्र मि ना।" 70 येशुयि हतिबाला जवाक पिन्सोङ, "च्हि ङा ङारि खे च्युनङिगारला धाधामा मानाइ? तेहि खि नाङने च्हि ते तुइ ना।" 71 धि ख्युइ सिमोन इस्करियोतयि पिजा यहुदायि भारेला नानाइबा हिना, चिचालानाना च्युनङियि नाङने च्हि क्याइरे याङ ख्युइ येशुला धोका तेर च्युइ क्याइसोङ।