1 Icɛr yiŋɛ irɛ bǝn nga Bulus, inǝ na ndum kɛ Kristi Yesɔ nǝ nek lɛ kɛ Arik nǝ ta ta zhɔk amɔr bǝn Kristi Yesɔ inǝ zhɔk susun amɔr

2 Gar bǝn Timoti izu muŋ didik ne tanyɛme:

Iki didik, ben ilɔ susun ben sik susun ire ben Arik tetɛɛ amɔr ben Kristi Yesɔ Ŋgɔŋ amɔr.

3 Bulus adi ir keŋ ndi Mnǝ blaa zhin ndi mne ngar Makidɔniya, izhin bǝ klɛ ne Afisa te di aneshir anuŋ amwɔ bɛ duŋ tsar lɛ kǝ mu 4 kǝr abɛ nek atu amen ne bla nga ŋli aneshir ndi ba yi ki didik ba. Ndi ina Gli antam gli nyɛmɛ te duŋ na ndum kɛ Arik, ndi ai tanyɛmɛ ne susun. 5 Iki zhɔk ne ti yi nek lɛ kǝŋe ayi tanyɛme ne akpa, ndi rɛ ne susun tsetser ben lɛ nǝ dur adidik ben itanyɛmɛ didik. 6 Aneshir anuŋ ne duŋ lɛ kǝŋe te kama zǝ lɛ kɛ sha. 7 Awɔb te aba abɛ yi abɛ tsar icɛr yi Musa, ama ba zhi ki yiŋ ndi aba blai ba ben iki yiŋ ndi aba ne tanyɛmɛ neyi.

8 Ta ne zhi te ilɛ kǝ cɛr yi Musa irɛ ate yi ndi azǝ kǝ ir kǝŋ ndi iyimɛ. 9 Nǝ tǝ yi shuzhi, aye mɛ, tǝ nɛna lelɛ yi kpa nyak, ba yi abe aner tsetser ba, ama abǝ yaŋ zǝ lɛ kɛ Arik bǝn abǝ zhib, tǝ abǝ yaŋ zǝ Arik bǝn lalɛ, tǝ abaŋ ndi ba zǝ Arik ba kai izhu mimin, bǝn abaŋ ndi aŋlɔk atetɛ ka anǝya, ǝ abǝ ŋlɔk aner, 10 bǝn abǝ bubu tiŋ, bǝn abɛ kam vuu akpa mɛn kur ɔ, bǝn abɛ zhib aneshir, tǝ vuŋ abaŋ ndi ati mu tɛ ba kɔka abɛ na kinuŋ kaaŋ kaŋ nǝ lɛ kɛ Arik. 11 Itsar yuŋɔ iyi nǝ lɛ didik kǝ men keŋ ndi agbar asak ne kǝ, lɛ didik kǝ men irɛ ngɔŋ bǝn ta anu adidik kɛ Arik.

12 Mne nyɛr Kristi Yesɔ Ŋgɔŋ amɔr, waŋ ndi ne nǝm mgbyamgbyaŋ, ndi ne tanyɛmɛ bǝn abɛm, te hriam tem na ndum maa, 13 ndi amɛ nǝ kukub Mnǝ lɛ lǝlɛ mimin ne tu maa tǝ na sak iya bǝn tǝu mla. Ama Arik ne wɔ lɔ susun muŋ tǝ Mnǝ na amɛ ne yaŋ zhi muŋ bǝn yaŋ tanyɛmɛ. 14 Ina iki didik iyi Ŋgɔŋ amɔr ne bwa shur ne tu muŋ tetɛk, ben tanyɛme tena nyɛr ndi iyi ne miŋ kɛ Kristi Yesɔ.

15 Waŋa ayi lɛ didik ndi ne bla kɛ ndi abɛ tanyɛmɛ ne kɛ bɔbɔk: Kristi Yesɔ ne nyɛ gɔnmimi te bɛ ta abɛ na zumimin azhɔk, te nga Bulus ne yine na zumimin ngɔŋ ne miŋ mǝnɛ. 16 Ama ne yiŋɛ Arik ne lɔ susun muŋ, ne na zumimin ŋgon, Kristi Yesɔ tei tsar lɔ susun maa tetɛk ben abɛm te bǝ yi iki zǝ ben abaŋ ndi ate ta Yesɔ anyɛ me te aba bɛ yik vli kɛ yaŋ klɛ. 17 Azǝzaŋa Itum waŋ ndi ba yi ne klɛtu ba, waŋ ndi ba yi nǝ wu kpa ba, waŋ ndi ba yigu ba, ndi wa ayi Arik ankyak, iyik ngɔŋ maa bǝn gbar asak bǝ yi maa iyaŋ klɛtu. Bǝyi amɛ.

18 Timoti, izu muŋ, me nǝgu lɛ keŋ ndi abɛ bla shar Arik ne bla kɛ ne atu mi kukub, utǝ zǝ kɛ utei tyak ikum iyi tyak didik, 19 bɛ gli tanyɛme mi anenen ne susun didik. Anuŋ ne kyak zǝ lɛ kɛ dur men te cok tanyɛmɛ men ala. 20 Nǝ miŋ mǝnɛ, Himinayas bǝn Askandari, abaŋ ndi Mnǝ baŋ ba sak shetan ne aŋɔk te bǝ tsar ba te kǝr abɛ lɛ ki mimin ne tu aye Arik ba.