1 Ire bǝn nga Bulus bǝn Timoti, agɛn abɛ Kristi Yesɔ. Gar bǝn aner abɛ Arik bɔbɔk nǝ Filibi ndi ayi nǝ min kɛ Kristi Yesɔ, bǝn angɔŋgɔŋ abɛ akabaŋkɔŋ bǝn abɛ lɔk tama:

2 Arik Tetɛɛ amɔr ben Yesɔ Kristi abɛ nek zhin iki didik ben sɔŋ kǝ sǝk.

3 M nyɛr Arik amuŋ ne atu min kɔte kpaŋ takɛ mte lǝlɛ min ne susun muŋ; 4 bǝn kɔte kpaŋ takɛ mben Arik nɛ atu min bɔbɔk, mben Arik nǝ nyɛr 5 ne ir keŋ ndi izhin nǝ lɔkmǝ ma ne ndum kɛ lɛ didik kǝ men vuŋ rɛ bɛr kuti tǝ nye mkpaŋ kǝŋe. 6 Neme mnǝ zhi tǝ Arik, waŋ ndi ne vuŋ ndum didik kǝŋe bǝn abɛzhin, atei gli kǝ gar klɛtu nǝ ber yi nyɛ Kristi Yesɔ. 7 Izhin yi nǝ susun muŋ kɔte mkpaŋ ta kɛ! Fe ire ankyak tǝm wɔ ndi mna nɛ tu min. Tǝ izhin bɔbɔk nǝ yi bǝn abɛm nǝ ta zhɔk yiŋ ndi Arik nɛ nǝm nɛ kǝ, kɔ ndi azǝzaŋa myi ne jaru bǝn mkpaŋ keŋ ndi mne yi isha tǝ nkli mgbamgbaŋ ne lɛ didik kɛ Arik tǝ mbla kǝ anenen. 8 Arik ayɛ ayi amuŋ tǝ mnǝ blaa zhin zub ndi mnǝ ndi iyi nǝ susun muŋ min ngɔŋ irɛ bǝn Kristi Yesɔ ne tu maa. 9 Mben Arik te nyɛr min bǝ flu tena flu tetɛk, bǝn izhi ilɛ kɛ zub ben ambuk anenen, 10 te izhin bɛ zhi hria iki yiŋ ndi yi didik naŋ. Fe izhin te yi tsetser ba nuŋ atei na nab zhin ivǝn ŋɔk ba ne bɛr nyɛ Kristi. 11 Itsen min itei shak ne iki didik yi na izub ndi Yesɔ Kristi wa ankyak anai, nǝ nǝk ngɔŋ bǝn gbar Arik asak.

Nga Bulus mwɔb te izhin bǝ zhi, amunya, te iki yiŋ ndi ne vuŋ me ne duŋ ilɛ kɔte ti. 12 M wɔb tǝ ijin bǝ zhi, akpa amuŋ, tǝ iki yiŋ ndi ne vuŋ me nǝ duŋ lɛ didik kǝ men kɔmɔ nǝ ti. 13 Neme, bɔbɔk abǝ blɛ amkpa nǝ tǝ ambuk ben iki aneshir anuŋ ne zhi te myi ne jaru te myi gen ayi Kristi. 14 Neme iyi nǝ jaru muŋ nǝ nǝk abǝ zǝ Arik mgbyamgbyaŋ kɛ zhɔk susun bǝn Ŋgɔŋ, te duŋ ba ayi ne klik susun kɛ du lɛ kɛ Arik yaŋ te sǝsǝk.

15 Neme anuŋ ne min mǝne adu ilɛ Arik ne ankiŋki ben wɔb akla, ama anuŋ adu kɛ ne susun didik. 16 Iyiŋɛ ina amɛ ne nyɛr akpa, te zhi te Arik ne nǝm ndum kɛ duŋ lɛ didik kǝ men maa ikɔ ne ti. 17 Anuŋ ba du lɛ kɛ Kristi susun didik ba, ama ne susun kɛ te bubu; ayik te di aba te duŋ me yik iyah ngɔŋ ndi myi ne jaru. 18 Bai ki yi lɛn susun ba! M nyɛr ne ki mɛ, neme ne du lɛ kɛ Kristi kɔte nkɔŋ takǝ, kɔ kai susun mimin kɔ kai susun didik. Fɛ M ntei zǝn nyɛr, 19 te mne zhi te ne ben Arik ben ilɔk maa ndi ire ben Izhu tsetser yi Yesɔ Kristi atei tam zhɔk. 20 Ishur ayi muŋ ngɔŋ ben zhɔk susun muŋ iyi bam tǝi na ndum muŋ tǝ gburkli nɛ ankɔŋ ba, ama ne kɔte mkpaŋ take, ne amɛ ma azǝzaŋa, M tei yi nǝ klik susun, te duŋ mkuŋ kpa muŋ bǝ duŋ sak kǝ Kristi yi ngɔŋ, kɔkai tsitsir kai ku. 21 Tǝ anii yi vli? Bǝn abem, ayi Kristi. Ayi Kristi. Iku, fe, itei gli nkimɛ. 22 Ama ate yi ndi itanyɛmɛ nǝ ivli kǝ kpa kǝŋe mtei mla nǝna ndum, fena bam ne zhi tǝ mbaŋ itayi ba. 23 Ikiki ya ivuŋ me gli. Mwɔb te mbǝ yi ne ivli te bɛ na yi ben Kristi, itayi itei rem naŋ; 24 ama ne atu min ire tǝm yi tsitsir. 25 Mnǝ zhi iyiŋe, ina yi amɛ mnǝ zhi tǝ mtei nkli. M tei kli bǝn abezhin bɔbɔk, tǝ nyaŋ nǝ li ti min tǝna nyɛr nǝ tanyɛmɛ, 26 te mte na yi ben abɛ zhin, izhin te yi ne iki ŋɔr asa ne atu muŋ ne tsin min ben Yesɔ Kristi. 27 Azǝzaŋa, iki didik yi ire tǝ izhin bǝ tsǝn nɛ ankɔŋ awaŋ ndi lɛ didik kǝ men kǝ Kristi ne bla, tǝ kɔ mte nyɛ yik zhin kɔ bam tǝ nyɛ ba, M tei wɔ te izhin kli gbamgbaŋ ne iki zhiin ben bine min te izhin bɛ nǝk atu amin ir keŋ ndi tanyɛmɛ ne susun min ne lɛ kɛ Arik. 28 Kǝr zhin bǝ tǝ sǝsǝk abǝ tǝ zɔr bǝn abezhin ba; kɔtǝ mkpaŋ takǝ izhin bǝ nak tsǝ kli, iyiŋɛ tei duŋ ba zhi tǝ atei suk kɔka izhin tei li, tǝ ayɛ Arik wa anǝk zhin ili ru. 29 Te nɛ nǝk izhin mkpaŋ kɛ na Kristi ndum, ba ne tanyɛmɛ bǝn abɔu ankyak ba, ama tǝna yik iya nǝ atu maa. 30 Azǝzaŋa izhin te zǝm tsik mgbu kǝŋe. Ai mgbu ir zhiin ndi zhin ne yik me zen tsik kɛ ne kpaŋ kɛ gayir, fe izhin ne zhi te mnak ri zen tsik kɛ.