Tito 1

1 Icɛr yiŋɛ ire bǝn nga Bulus, igen ayou Arik mna yi nena ndum kɛ Yesɔ Kristi netu abɛ ta nyɛmɛ ne abɛ hria Arik bǝn Mgbemgbeb kɛ zhi lɛ didik ndi gar nkɔŋ kɛ zhi zǝ Arik 2 ita nyɛmɛ te na zhi sik kɛ shur ayi ne sɔŋ kɛ yaŋ klɛtu, ikeŋ ndi Arik ba timu ba, ne kpai aŋyak tǝ mkpaŋa bǝ shi tǝ, 3 fe ne mkpaŋ kɛ na nyak maa ne gli ilɛ maa te bǝ laŋ ne ankɔŋ ane bla lɛ keŋ ndi ne nǝm ne nek lɛ kɛ Arik amɔr ndi wa ayi ne ta ta zhɔk,

4 Mǝ cɛr shar bǝn Titus, izu muŋ didik ne ta nyɛmɛ bɔbɔk mɔr:

Inaki didik ben sɔŋ kɛ sik ndi ire ben Arik ayi Tetɛɛ ben Yesɔ Kristi amɔr ne ta ta zhɔk.

Ndum kɛ na Titus ne Karita

5 Iki yiŋ ndi mne duŋ zhin ne Karita ma te izhin bǝ lu tsǝ klɛ ne nki ndum kɛ yaŋ na klɛ mɔr te hria zhin anuŋkub ne kɔte ntun tayi, ndi mne bla zhine. 6 Anuŋkub ne akaba kǝr abɛ yi ne lalɛ ba, abɛ yi lulum ne iwa zhiin, iwaŋ ndi amun amaa azǝ Arik tena yik rɛ asusun amene ba aklik tu tena te mla ba. 7 Tǝ ine blɛ tɔ amkpa ne ta nyɛmɛ te bɛ na ndum kɛ Arik, kǝr abɛ yi ne lalɛ ba, kǝr abɛ yi ne tsar mgbyamgbyaŋ ba, kǝr abɛ yi ne te mfu andanda ba, kǝr abɛ yi ne so ki rǝrǝ ba, kɔ ne nab ŋɔk ŋur neshir andanda ba, kǝr abɛ yi ne tsǝ zumen aŋyak gɔŋ te wa abɛ lii ti ba. 8 Ndi amɛ abɛ yi ne ta aneshir, waŋ ndi a tanyɛme ne ki didik, ine gli tu mgbamgbaŋ, itsetser ner ndi agli kpa maa anenen. 9 Neshire abɛ yi ne klik ne lɛ kɛ Arik ndi ne tsa ru ma, te duŋu abɛ nek anuŋ anu te duŋ ba bɛ gli tsar lɛ didik te bɛ duŋ lɛ kɛ abɛ kyak kɛ. 10 Tǝ aneshir abɛ wɔb akla ayime tetɛk, alɛ nenu te lɔm aneshir, netu abɛ yaŋ kɔkzik 11 Atei ku anu ne mgbyamgbyaŋ, te azǝn kpur aner ne lɛ keŋ ndi ba tsǝn anenen ne nkanlɛ yi Arik te ba abɛ vu adudunki isha. 12 Iner nuŋ ne miŋ mǝne ne di, <<Aner abɛ ntun iyi Karita kɔte mkpaŋ takɛ atimu, abla kiki mimin, tena yi abɛ ankɔ tiŋ.>> 13 Ilɛ kɛ bla kǝŋe iyi zub. Ndi amɛ, Titus ubǝ gbaŋ abɛ zǝ Arik atɔŋ ŋgɔŋ, te duŋ ba abɛ klɛ mgbamgbaŋ ne ta nyɛmɛ ne nkɔŋ kɛ Arik. 14 ndi kǝr abɛ shur atɔŋ te wɔ tsar iyi mu abɛ Yahudawa ben nkan lǝlɛ men yi kyak lɛ kɛ zub ba. 15 Nǝ gar kɛ abɛ tsetser, ikiki bɔbɔk yi tsetser, fena abaŋ ndi alalɛ tena kyak ta nyɛmɛ, te ikinuŋ ba yi tsetser ba. Ai lɛ didik, asusun amene ben ilɛ kɛ miŋ ne mǝne ana ki mimin. 16 Ayik te aba ne zhi Arik, ama ina mǝne iduŋ ba tun Arik. Ba klik ba, aduŋ zǝ lɛ kɛ Arik te na ki yiŋ ndi ba rɛ ba.