1 Fe iwa Titus ubǝ tsar abɛ zǝ Yesɔ iki yiŋ ndi iyi anenen ne nkan lɛ didik. 2 Ubǝ tsar acicɛ anenen te kǝr abɛ yi abɛ baŋ afuk andanda ba. Abɛ yi aner abaŋ ndi atɔ ba shak ayi, abɛ vuŋ kpa,abɛ tsǝ klɛ ne ta nyɛmɛ ne nyɛr akpa ben tsǝ klɛ. 3 Neme, ubǝ tsar acicɛ amba te abɛ tɔ aneshir ashak ayi ne tsǝn mǝne, ba abɛ cɔk aneshir la ba, kɔ abɛ so ki rǝrǝ ba, ama abɛ atsar lɛ kɛ anenen. 4 Fena acicɛ amba abɛ yi abɛ tsar asun amba te abɛ nyɛr alulum amen ben amumun amen, 5 te bɛ vuŋ kpa bǝn sɔŋ kɛ yi tsetser, abɛ yaŋ sik kpa ne kɔb, abɛ yi ne asusun adidik, bǝn abɛ zǝ ilɛ kɛ alulum amen, te duŋ kǝr nuŋ abɛ yaŋ tɔ ba shak ayi ba. 6 Ndi amɛ, ubǝ na bla alulum te abɛ vuŋ akpa men. 7 Nǝ kɔte ni ubǝ duŋ aner atɔ ki didik ne tsǝn mi are iki yiŋ ndi unai. Nǝ gar kɛ tsar lɛ ubǝ duŋ ba abɛ yik tsǝn mi bǝ yi anenen, ubǝ na tsǝ klɛ ne nkɔŋ kɛ Arik 8 bǝn nkan lɛ didik yi klik ndi nuŋ ba tei zerǝ atyak ahrie ba, te duŋ abaŋ ndi ba ne ata nyɛmɛ bene bɔu ba ishisha bǝ te ba, ba ayi ne iki mimin iyi di ne atu amɔr ba. 9 Ubǝ na tsar agɛn te bɛ zǝ atukɔ amen ne kɔ te ni, abɛ tsǝ aklɛ te duŋ ba abɛ nyɛr ba, kǝr abɛ nga aŋa ba, 10 te kǝr abɛ zhib ba, ama abɛ duŋ aneshir ata nyɛmɛ ben aba, te duŋ kɔ ne gar takɛ, atei duŋ tsar nkan lɛ iye Arik iyi ta ta zhɔk bǝ men. 11 Tǝ yi iki didik yi Arik iyiŋ ndi gli ta zhɔk nyɛmɛ neka ru klɛ aneshir bɔbɔk. 12 Ilɛ kɛ Arik ibla ta te di <<kyak ta nyɛmɛ>> ne kiki mimin bǝn kiki yi men iyi gɔŋ mimi, te tabǝ vuŋ kpa mgbamgbaŋ, te sɔŋ anenen, te tsǝn anenen ne mkpaŋ kǝŋe. 13 Ndi ta sɔŋ ŋub isak ayi mɔr didik iyi mwaŋ ru Arik amɔr Ŋgɔŋ bǝn ne ta ta zhɔk, Yesɔ Kristi. 14 Yesɔ waŋ ndi ne nek tu maa ne atu amɔr, te bɛ gli ta bɔbɔk are kiki mimin yi na mɔr te ana ŋla tu maa aneshir abaŋ ndi ayi amaa, abɛ nyɛr na ki didik. 15 Iki yiŋɛ, fena, ayi iki yiŋ ndi utei tsarǝ, tena gbaŋ ba atɔŋ ne mgbyamgbyaŋ. Kǝr ubǝ duŋ inuŋ abɛ tɔu iyaŋ shak ayi ba.