Genesis 45

Nagpaila si Jose sa Iyang mga Igsoon

1 Wala na gayod mapugngi ni Jose ang iyang gibati, busa gipagawas niya ang iyang mga sulugoon. Ug sa dihang sila na lang sa iyang mga igsoon ang nahibilin, nagpaila siya. 2 Mihilak ug kusog si Jose, busa nadunggan kini sa mga Ehiptohanon, ug gibalita kini didto sa palasyo sa hari.

3 Miingon si Jose sa iyang mga igsoon, "Ako si Jose! Tinuod ba gayod nga buhi pa ang atong amahan?" Apan wala makatubag ang iyang mga igsoon kaniya kay nahadlok sila.