Marcos 10

Giayo ni Jesus ang Buta nga si Bartimeo

46 Miabot sila sa Jerico. Ug sa dihang mogawas na si Jesus niini nga lungsod uban sa iyang mga tinun-an, misunod kanila ang daghang tawo. Sa daplin sa dalan, adunay usa ka buta nga naglingkod ug nagpakilimos. Siya si Bartimeo (nga ang buot ipasabot, "anak ni Timeo"). 47 Sa pagkadungog niya nga anaa si Jesus nga taga-Nazaret, misinggit siya, "Jesus, kaliwat ni David, kaloy-i intawon ako!"

48 Gibadlong siya sa mga tawo aron mohilom. Apan gikusgan pa hinuon niya ang pagsinggit, "Kaliwat ni David, kaloy-i intawon ako!"

49 Mihunong si Jesus ug miingon, "Tawga ninyo siya."

Busa gitawag nila ang buta, ug giingnan, "Paglipay, dali tindog kay gitawag ka ni Jesus."

50 Gilabay niya ang iyang kupo ug nagdali-dali siyag duol kang Jesus.

51 Ug miingon si Jesus kaniya, "Unsay imong gusto nga buhaton ko kanimo?"

Mitubag ang buta, "Magtutudlo, gusto ko nga makakita pag-usab."

52 Ug giingnan siya ni Jesus, "Lakaw, ang imong pagtuo maoy nakaayo*10:52 nakaayo: o nagluwas. kanimo." Diha-diha nakakita siya ug misunod kang Jesus sa dalan.