Marcos 3

Ang Tawo nga Baldado ug Kamot

1 Mibalik pag-usab si Jesus sa sinagoga ug adunay tawo didto nga baldado ug kamot. 2 Tungod kay ang mga Pariseo nangita ug pamaagi nga ikasumbong nila si Jesus, gibantayan nila kon ayohon niya kadtong tawo sa Adlaw nga Igpapahulay. 3 Miingon si Jesus sa tawo nga baldado ang kamot, "Dali dinhi sa atubangan."

4 Unya nangutana siya sa mga Pariseo, "Unsa ba diay ang gitugot sa Kasugoan sa Adlaw nga Igpapahulay: ang paghimo ba ug maayo o ang paghimo ug daotan? Ang pagluwas ba sa kinabuhi, o ang pagpatay?" Apan wala gayoy mitubag.

5 Nasubo si Jesus tungod sa kagahi sa ilang kasing-kasing ug masuk-anon nga mitan-aw kanila. Unya miingon siya sa tawo nga baldado ug kamot, "Ituy-od ang imong kamot!" Gituy-od niya, ug naayo kini.