Marcos 5

Ang Anak ni Jairo ug ang Babaye nga Nagtali-dugo

21 Sa nakabalik na usab si Jesus sa pikas nga bahin sa lanaw sakay sa sakayan, samtang naa pa siya sa kilid sa lanaw, daghan na dayon ang nangdool niya nga tawo. 22,23 Miabot usab didto si Jairo nga usa sa mga pangulo sa sinagoga. Sa pagkakita niya kang Jesus miluhod siya kaniya ug nagpakiluoy, "Ang akong anak nga dalagita himalatyon na. Kon mahimo adtoi siya didto sa balay ug ipandong ang imong kamot kaniya aron mamaayo siya ug mabuhi!" 24 Busa miuban si Jesus kaniya. Daghan kaayong mga tawo ang misunod kang Jesus ug nagdasok sila ngadto kaniya.

25 Adunay babaye didto nga nagtali-dugo*5:25 nagtali-dugo: kini nga babaye adunay problema sa iyang regla. sulod na sa dose ka tuig. 26 Daghan na nga pag-antos an iyang giagian sa mga kamot sa nagkalain-laing mga mananambal. Nahurot na niya ang tanan niyang pilak ug kabtangan, apan wala gayod siya mamaayo. Misamot hinuon ang iyang sakit. 27 Nadungog niya ang balita mahitungod kang Jesus, busa miliot siya sa daghang tawo aron mahikap ang kupo ni Jesus. 28 Miingon siya sa iyang kaugalingon, "Kon mahikap ko lang bisan ang iyang bisti, mamaayo gayod ako." 29 Busa gihikap niya ang bisti ni Jesus ug diha-diha miundang ang iyang pagtali-dugo, ug nabati niya nga naayo na siya sa iyang sakit.

30 Nabati ni Jesus nga adunay gahom nga migawas gikan kaniya, busa milingi dayon siya ug miingon, "Kinsa ang mihikap sa akong bisti?"

31 Mitubag ang iyang mga tinun-an, "Kadaghan sa mga tawo nga nagdasok diha kanimo, nganong mangutana ka pa man kon kinsa ang mihikap kanimo?"

32 Apan naglingi-lingi pa gayod siya kon kinsa ang mihikap kaniya. 33 Tungod kay nasayran sa babaye kon unsa ang nahitabo kaniya, miduol siya kang Jesus nga nagkurog sa kahadlok. Miluhod siya ug misulti sa tinuod. 34 Unya miingon si Jesus kaniya, "Anak ko, naluwas ka tungod sa imong pagtuo. Busa pauli ug ayaw na ug kaguol sa imong sakit kay naayo ka na."

35 Samtang nakigsulti pa siya sa babaye, adunay nangabot nga pipila ka mga tawo gikan sa balay ni Jairo nga usa sa mga pangulo sa sinagoga. Miingon sila kang Jairo, "Patay na ang imong anak. Ayaw na samoka ang magtutudlo."

36 Apan wala magtagad si Jesus sa ilang giingon. Miingon siya kang Jairo, "Ayaw kahadlok. Tuo lang."

37 Apan wala siyay gipauban gawas kang Pedro ug ang magsoon nga si Santiago ug si Juan. 38 Sa pag-abot nila didto sa balay ni ang pangulo sa sinagoga nakita ni Jesus nga nagkaguliyang ang mga tawo. Ug adunay nanghilak ug nagminatay. 39 Misulod sila sa balay ug miingon siya sa mga tawo, "Nganong nagkaguliyang ug nanghilak man kamo? Wala mamatay ang bata, kondili natulog lang siya." 40 Gikataw-an nila si Jesus.

Busa gipagawas niya ang tanang mga tawo ug gipasulod niya sa kuwarto sa bata ang amahan ug inahan niini, ug ang tulo nga iyang kauban. 41 Unya iyang gikuptan ang kamot sa bata ug miingon, "Talitha, koum," nga ang buot ipasabot, "Inday, bangon!" 42 Ug diha-diha mibangon ang dalagita ug naglakaw-lakaw. (Ang maong dalagita nagpanuigon ug dose ka tuig.) Hilabihan gayod ang ilang katingala sa nahitabo. 43 Apan gipahimangnoan niya sila nga dili gayod mosulti kang bisan kinsa. Ug giingnan niya sila nga hatagan ug pagkaon ang bata.