Marcos 8

Gipakaon ni Jesus ang upat ka libo ka mga Tawo

1 Human sa pipila ka adlaw, nagtigom na usab ang daghang tawo didto kang Jesus. Sa dihang wala na silay pagkaon gitawag ni Jesus ang iyang mga tinun-an ug giingnan, 2 "Naluoy gayod ako niining mga tawhana. Tulo na ka adlaw silang nag-uban-uban kanako ug wala na silay pagkaon. 3 Kon papaulion ko sila nga gutom basin ug makuyapan sila sa dalan kay layo pa man kaayo ang gigikanan sa uban kanila."

4 Mitubag ang iyang mga tinun-an, "Asa ba kita makakuha ug pagkaon dinhi sa mamingaw nga dapit nga ipakaon niining mga tawhana?"

5 Nangutana si Jesus kanila, "Pila ba kabuok ang inyong pan diha?" Mitubag sila, "Pito kabuok."

6 Gipalingkod ni Jesus ang mga tawo sa yuta. Gikuha niya ang pito ka pan ug nagpasalamat sa Dios. Pagkahuman, gipikas-pikas niya kini ug gihatag sa iyang mga tinun-an ug giapod-apod nila kini sa mga tawo. Ug gibuhat nila kini. 7 Aduna usab sila pipila ka gagmay nga mga isda. Gipasalamatan usab niya kini ug gihatag sa iyang mga tinun-an aron i-apod-apod sa mga tawo. 8 Nangaon sila ug nangabusog. Pagkahuman nilag pangaon, gitigom nila ang pan nga sobra, ug napuno ang pito ka bukag. 9 Ang mga lalaki lang nga nangaon mga 4,000. Human niadto gipapauli ni Jesus ang mga tawo