Mateus 3

Nagwali si Juan Mahitungod kang Jesus

1 Niadtong mga adlawa miabot si Juan nga Tigbautismo sa kamingawan sa Judea ug nagsugod siya sa pagsangyaw. 2 Miingon siya, "Paghinulsol kamo ug biyai ninyo ang inyong mga sala, kay ang gingharian sa Langit haduol na!" 3 Si Juan mao ang gihisgotan ni Propeta Isaias sa dihang miingon siya:

"Adunay tigbalita nga nagsinggit sa kamingawan,

‘Andama ninyo ang agianan alang sa Ginoo.

Tul-ira ang dalan nga iyang agianan.’ "*3:3 Isa. 40:3

4 Ang bisti ni Juan hinimo gikan sa balhibo sa kamelyo ug ang iyang bakos panit sa mananap. Ang iyang pagkaon dulon ug dugos. 5 Daghan gayod ang miadto kaniya nga mga tawo nga gikan sa Jerusalem, sa mga lungsod sa Judea ug sa mga lungsod nga duol sa Suba sa Jordan. 6 Gisugid nila ang ilang mga sala ug gibautismohan sila ni Juan didto sa Suba sa Jordan.