Mateus 8

Giayo ang Duha ka Tawong Adunay Daotang Espiritu

28 Sa pag-abot nila sa tabok sa lanaw, sa dapit sa mga Gadarenhon,*8:28 Gadarenhon: sa uban nga mga kopya sa Griego, Gerasenhon o Gergesenhon. gisugat si Jesus sa duha ka tawo nga migawas gikan sa mga langub nga lubnganan. Kining duha ka tawo gigamhan sa mga daotang espiritu. Bangis sila kaayo, busa nahadlok ang mga tawo nga moagi didto. 29 Sa pagkakita nila kang Jesus misinggit sila, "Ikaw nga Anak sa Dios, unsay imong labot kanamo? Mianhi ka ba dinhi aron silotan kami bisag dili pa ang gitakdang panahon?"

30 Didto sa unahan adunay daghang baboy nga nangungad. 31 Nagpakiluoy ang mga daotang espiritu nga nag-ingon, "Kon abugon mo man gayod kami, tugoti na lang kami nga mosulod didto sa mga baboy."

32 Miingon si Jesus kanila, "Sige, lakaw!" Busa nanggawas sila gikan sa duha ka tawo ug misulod sa mga baboy. Unya nagdinaganay ang mga baboy paubos sa pangpang sa lanaw ug nangalumos.

33 Nanagan ang mga nag-atiman sa mga baboy paingon sa lungsod ug nanugilon kon unsa ang nahitabo sa mga baboy ug sa duha ka tawo nga gigamhan sa mga daotang espiritu. 34 Busa ang tanang mga tawo sa lungsod nangadto kang Jesus ug nagpakiluoy nga mobiya siya sa ilang dapit.