Gitawag ni Jesus si Mateo
9 Unya mibiya si Jesus niadtong dapita, ug samtang naglakaw siya, nakita niya ang maniningil ug buhis nga si Mateo nga naglingkod sa iyang pwesto. Miingon si Jesus kaniya, "Dali, uban kanako." Mitindog dayon si Mateo ug miuban kang Jesus.
10 Samtang nagkaon si Jesus ug ang iyang mga tinun-an didto sa balay ni Mateo, daghang maniningil ug buhis ug uban pa nga giila nga mga makasasala ang miabot ug nakig-uban sa pagpangaon. 11 Nakita kini sa mga Pariseo. Busa gipangutana nila ang iyang mga tinun-an, "Nganong nakig-uban man sa pagpangaon ang inyong magtutudlo sa mga maniningil ug buhis ug sa uban pang mga makasasala?"
12 Pagkadungog ni Jesus niini, mitubag siya, "Ang tawo nga maayog panglawas wala magkinahanglan ug doktor, ang masakiton lang. 13 Lakaw kamo ug tun-i ninyo kon unsa ang kahulogan niining giingon sa Kasulatan, ‘Wala ako magtinguha sa inyong mga halad. Ang gusto ko nga magmaluloy-on kamo sa inyong isigka-tawo.’9:13 Ose. 6:6 Wala ako moanhi aron sa pagtawag niadtong nagtuo nga sila matarong, kondili sa mga makasasala."