12 Ug ang tanang katawhan sa Juda nagdala sa ikapulo sa ilang mga trigo, bino, ug lana didto sa mga bodega. 13 Ang gipadumala ko sa mga bodega mao sila si Shelemia nga pari, si Sadok nga manunulat sa Kasugoan, ug si Pedaya nga usa ka Levita. Gipatabang ko usab kanila si Hanan nga anak ni Zacur ug apo ni Matania. Sila ang akong gipili tungod kay kasaligan sila. Gisalig usab nako kanila ang pag-apod-apod sa mga panginahanglanon sa ilang isigka-magbubuhat sa templo.

14 Unya nag-ampo ako, "O Dios ko, hinumdomi ug ayaw gayod kalimti ang gipanghimo ko alang sa imong Templo ug sa mga buluhaton niini."