Mateo 14:1-12

Ang Pagkamatay ni Juan na Tagapagbautismo

1 Nang panahong iyon, nabalitaan ni Herodes na pinuno ng Galilea ang tungkol kay Hesus. 2 Sinabi niya sa kanyang mga opisyal, "Siyaʼy si Juan na Tagapagbautismo! Muli siyang nabuhay, kaya nakagagawa siya ng mga himala."

3 Sapagkat ipinadakip noon ni Herodes si Juan. Ipinagapos at ipinabilanggo niya ito dahil kay Herodias na asawa ng kapatid niyang si Felipe. 4 Palaging sinasabihan ni Juan noon si Herodes, "Labag sa Kautusan na gawin mo siyang asawa." 5 Gusto sanang ipapatay ni Herodes si Juan ngunit natakot siya sa mga Hudyo dahil itinuturing nilang propeta si Juan.

6 Nang dumating ang kaarawan ni Herodes, sumayaw para sa mga bisita ang dalagang anak ni Herodias na ikinatuwa naman ni Herodes. 7 Kaya sumumpa siyang ibibigay sa dalaga ang anumang hingin nito. 8 Sa udyok ng kanyang ina, sinabi ng dalaga, "Gusto ko pong ibigay nʼyo sa akin ang ulo ni Juan na Tagapagbautismo na nakalagay sa isang bandehado." 9 Nalungkot ang hari sa kahilingang iyon. Ngunit dahil sa pangako niyang narinig mismo ng mga bisita, iniutos niya na gawin ang kahilingan ng dalaga. 10 Kaya pinugutan ng ulo si Juan sa loob ng bilangguan, 11 at inilagay ang ulo niya sa isang bandehado at dinala sa dalaga. At ibinigay naman ito ng dalaga sa kanyang ina. 12 Ang bangkay ni Juan ay kinuha ng kanyang mga alagad at inilibing, at ibinalita nila kay Hesus ang nangyari.