Obadias 1

Ang Pangitain ni Obadias

1 Ito ang mga pangitain ni Obadias.

Ganito ang sinabi ng Panginoong Diyos tungkol sa bansang Edom:

Narinig namin mula sa Panginoon

na nagsugo siya ng mensahero

sa mga bansa,

"Tumindig kayoʼt salakayin natin ito!"

2 "Makinig kayo!

Gagawin ko kayong pinakamahina

sa lahat ng bansa

at kayoʼy labis na hahamakin.

3 Sinasabi ninyong walang

makakapagpabagsak sa inyo

dahil nakatira kayo sa lugar

na mataas at mabato.

Sa pagyayabang ninyong ito,

dinadaya lamang ninyo

ang inyong mga sarili.

4 Sapagkat kahit lumipad pa kayong

tulad ng agila

at magpugad sa mga bituin,

ibabagsak ko pa rin kayo sa lupa,"

sabi ng Panginoon.

5 "Hindi baʼt kapag pinasok

ng mga magnanakaw

ang iyong bahay,

ang kinukuha lamang nila

ay ang kanilang magustuhan?

At hindi baʼt ang mga namimitas ng ubas

ay nag-iiwan ng ilang bunga?*1:5 Kaugalian ng mga Israelita na mag-iwan ng mga bunga ng kanilang mga pananim sa panahon ng pag-ani para sa mga dukha. Tingnan sa Lev. 19:10; Deu. 24:21. Maaaring ganito rin ang kaugalian ng mga taga-Edom.

Ngunit kayong lahat

ay lilipulin ng inyong mga kaaway.

6 Hahanapin nila at kukunin ang lahat

ng nakatagong kayamanan

ng mga lahi ni Esau.

7 Lilinlangin kayo

ng mga kakampi ninyong bansa.

Ang mga bansang nakipagkaibigan sa inyo

ay siya ring sasalakay sa inyo,

at palalayasin nila kayo sa inyong bayan.

Silang mga nakisalo sa inyo

ang siya pang palihim

na maglalagay

ng bitag laban sa inyo.

8 "Ako, ang Panginoon, ang nagsasabi

na sa araw ng paghatol ko sa inyo,

lilipulin ko ang marurunong sa inyo.

Mawawala ang karunungan sa Edom

na tinatawag na Bundok ni Esau.

9 Manginginig sa takot

ang inyong mga sundalo

sa lungsod ng Teman,

kaya mamamatay kayong lahat

na nakatira sa Bundok ni Esau."

Ang Kasalanan ng mga Taga-Edom

10 Dahil sa inyong pagmamalupit

sa lahi ni Jacob na inyong kapatid,

malalagay kayo sa kahihiyan

at lilipulin magpakailanman.

11 Pinabayaan lamang ninyo

ang Jerusalem

nang salakayin ito

ng ibang bansa.

Pinabayaan ninyong kunin

ang kanilang mga ari-arian

at paghati-hatian sa pamamagitan

ng palabunutan.

Kayoʼy tulad nila na mga kaaway ng Israel.

12 Hindi sana ninyo ikinatuwa

ang panahon ng kapahamakan

ng mga taga-Juda na inyong kalahi.

Hindi sana kayo nagalak

sa panahon ng kanilang pagkawasak.

At hindi sana kayo nagmayabang

sa panahon ng kanilang kahirapan.

13 Hindi dapat sana kayo pumasok

sa lungsod ng aking mga mamamayan

sa panahon ng kanilang kasawian

at kumuha ng kanilang mga ari-arian.

At hindi sana kayo natuwa

sa panahon ng kanilang paghihirap.

14 Hindi sana kayo nag-abang

sa mga sangang-daan

upang patayin ang mga tumatakas

mula sa Jerusalem.

At hindi sana ninyo sila ibinigay

sa mga kaaway

sa panahon ng kanilang kasawian.

Parurusahan ng Diyos ang mga Bansa

15 "Malapit na ang araw

ng paghatol ng Panginoon

sa lahat ng bansa.

At kung ano ang inyong ginawa sa iba,

ganoon din ang gagawin sa inyo.

Kung paano ang pagtrato nʼyo sa iba,

ganoon din ang magiging pagtrato

nila sa inyo.

16 Kung paanong pinarusahan

ang aking mga mamamayan*1:16 ang aking mga mamamayan: Sa Hebreo, kayo.

sa aking banal na bundok,*1:16 banal na bundok: O Bundok ng Zion.

parurusahan din ang lahat ng bansa.

Matinding parusa

ang ibibigay ko sa kanila

hanggang malipol silang lahat.

Magtatagumpay ang Israel

17 "Ngunit may matitirang mga Israelita

sa bundok ng Zion,

at magiging banal muli ang lugar na ito.

Maibabalik sa mga lahi ni Jacob

ang mga lupaing dati nilang pag-aari.

18 Ang mga lahi nina Jacob at Jose*1:18 mga lahi nina Jacob at Jose: Si Jacob ay kumakatawan sa mga mamamayan ng Juda, at si Jose naman ay kumakatawan sa mga mamamayan ng Israel.

ay magiging tulad ng apoy

na lilipol sa lahi ni Esau,

tulad ng pagsunog sa dayami.

At walang matitira sa lahi ni Esau."

Ito ang sinabi ng Panginoon.

19 "Sasakupin ng mga taga-Negeb*1:19 Negeb: Ang timog ng Juda.

ang bundok ni Esau,

at sasakupin ng mga nakatira

sa kaburulan sa kanluran*1:19 kaburulan sa kanluran: Sa Hebreo, Shefela.

ang lupain ng mga Filisteo.

Sasakupin din ng mga Israelita

ang lupain ng Efraim at Samaria,

at sasakupin naman

ng lahi ni Benjamin ang Gilead.

20 Sasakupin ng nga Israelitang

galing sa pagkabihag

ang lupain ng Canaan

hanggang sa Zarefat.

Ang mga taga-Jerusalem

na binihag sa Sefarad

ay sasakupin naman

ang mga bayan ng Negeb.

21 Aakyat sa Bundok ng Zion

ang mga tagapagpalaya ng Israel

upang pamahalaan ang mga taong

naninirahan sa Bundok ni Esau.

At ako, ang Panginoon,

ang siyang maghahari."