17 Ol elda* we oli stap wok strong long wok blong lidim ol man, jos i mas ona gud long olgeta mo i mas tingbaot blong givim dabol pei long olgeta. Tok ya i stret long olgeta we oli stap hadwok blong prij mo blong tijim ol man, 18 ✝from we Baebol* i talem se, "Sipos yufala i tekem buluk i kam blong i purumpurumbut long hed blong wit* blong kilimaot ol sid blong wit ya, be bambae yufala i no mas fasem maot blong hem, yufala i mas letem hem i kakae sam long ol wit ya." Mo Baebol i talem tu se, "Sipos wan man i wok blong narafala man, i stret blong man ya i pem hem."