13 ✝Nao i kam klosap long taem blong lafet* blong ol laen blong Isrel, we nem blong hem "Lafet blong Pasova"*, nao Jisas i go antap long Jerusalem*. 14 Nao long vranda blong haos* blong God, Jisas i luk plante man we oli stap salem buluk mo sipsip mo nawimba, blong ol man oli pem blong mekem sakrefaes. Mo i gat ol man tu we oli stap sidaon biaen long ol tebol blong olgeta, oli stap jenisim mane blong ol man blong ol narafala ples.* 15 Nao hem i tekem sam smol rop, i mekem wip long hem. Nao hem i ronemaot olgeta man ya wetem ol buluk mo ol sipsip blong olgeta oli goaot long haos blong God. Mo hem i kafsaedem ol tebol blong ol man ya we oli stap jenisim mane, mo i sakem ol mane blong olgeta i go olbaot. 16 Mo hem i tok long ol man we oli stap salem nawimba, i talem se, "!Yufala i tekem ol samting ya i go afsaed! !Yufala i no mekem haos blong Papa blong mi i kam olsem ples blong mekem maket!" 17 ✝Nao ol man blong hem oli tingbaot tok blong Baebol we i talem se, "Mi mi wantem tumas we evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet."