Jisas i toktok wetem Nikodimas
1 Nao i gat wan lida blong ol laen* blong Isrel* i stap, we nem blong hem Nikodimas. Hem i wan Farisi*, 2 mo wan taem, long naet, hem i kam blong toktok wetem Jisas. Hem i talem se, "Tija. Mifala i save we yu yu wan tija we God i sanem yu yu kam, from we i no gat man we i save mekem ol merikel ya we yu yu stap mekem, sipos God i no stap wetem hem."
3 Jisas i talem long hem se, "Tru mi talem long yu, sipos man i no bon bakegen blong i kam niufala man, bambae hem i no save luk rod blong kam we God i King* blong hem.3.3: Narafala rod blong tanem tok ya blong Jisas i olsem. Tru mi talem long yu, sipos man i no bon bakegen blong i kam niufala man, bambae hem i no save luk niufala wol ya we God i king long hem."
4 Nao Nikodimas i talem se, "?Man we i kam bigman finis, hem i save bon bakegen olsem wanem? Hem i no save gobak long bel blong mama blong hem, blong i bon bakegen."
5 Jisas i talem se, "Tru mi talem long yu, sipos man i no bon long wota mo long Tabu Spirit, bambae hem i no save kam we God i King blong hem.3.5: Narafala rod blong tanem tok ya blong Jisas i olsem. Tru mi talem long yu, sipos man i no bon long wota mo long Tabu Spirit, bambae hem i no save go insaed long niufala wol ya we God i king long hem. 6 Man we i bon long man, hem i man, i blong wol ya, be spirit blong man i bon long Tabu Spirit, mo i blong niufala wol ya we bambae i kam. 7 I nogud yu sapraes from we mi talem long yu se, ‘Yu yu mas bon bakegen, yu mas kam niufala man.’ 8 Win i stap blu long wanem ples we hem i wantem blong i blu long hem. Yu harem noes blong hem, be yu no save weples win ya i aot long hem, mo weples i stap go long hem. Be olgeta man we oli bon long Tabu Spirit oli olsem samting ya nomo."