16 Ngizacela kuBaba ukuthi alinike omunye umeli ukuthi alisize abe lani kuze kube laphakade, 17 uMoya weqiniso. Ilizwe ngeke limamukele ngoba kalimboni njalo kalimazi. Kodwa lina liyamazi ngoba uhlala lani njalo uzakuba lani. 18 Kangisoze ngilitshiye lizintandane, ngizabuya kini. 19 Kakusekhatshana ukuthi umhlaba ungabe usangibona njalo kodwa lina lizangibona. Ngenxa yokuthi ngiyaphila, lani lizaphila futhi. 20 Ngalolosuku lizakunanzelela ukuthi ngikuBaba, lina likimi, lami ngikini. 21 Lowo olayo imilayo yami, ayigcine, nguye ongithandayo. Lowo ongithandayo uzathandwa nguBaba njalo lami ngizamthanda ngiziveze kuye."

22 Ngakho uJudasi (hatshi uJudasi Iskariyothi) wathi, "Kodwa Nkosi, kungani ujonge ukuziveza kithi, hatshi emhlabeni na?"

23 UJesu waphendula wathi, "Lowo ongithandayo uzalalela imfundiso yami. UBaba uzamthanda njalo sizakuza kuye sakhe umuzi wethu kanye laye. 24 Lowo ongangithandiyo kayikulalela imfundiso yami. Amazwi la eliwezwayo kayisiwo wami, ngakaBaba ongithumileyo.

25 Konke lokhu ngikukhulume ngiseselani. 26 Kodwa uMeli, uMoya ONgcwele, uBaba azamthumela ebizweni lami, uzalifundisa zonke izinto njalo uzalikhumbuza konke engikukhulume kini.