1 त्या दिवशी तुम्ही म्हणाल:

"याहवेह, मी तुमची स्तुती करेन,

जरी तुम्ही माझ्यावर रागावला होता,

तरी तुमचा राग दूर झाला आहे

आणि तुम्ही माझे सांत्वन केले आहे.

2 निश्चितच परमेश्वर माझे तारण आहेत;

मी भरवसा ठेवेन आणि घाबरणार नाही.

याहवेह, याहवेह स्वतः माझे सामर्थ्य आणि माझे संरक्षण*12:2 किंवा गीत आहेत;

ते माझे तारण झाले आहेत."

3 तारणाच्या विहिरींतून

तुम्ही आनंदाने पाणी काढाल.

4 त्या दिवशी तुम्ही म्हणाल:

"याहवेहची स्तुती करा, त्यांच्या नावाची घोषणा करा;

त्यांनी जे काही केले आहे ते राष्ट्रांमध्ये माहीत होऊ द्या,

आणि असे घोषित करा की, त्यांचे नाव गौरवान्वित आहे.

5 याहवेहसाठी गीत गा, कारण त्यांनी गौरवशाली कार्ये केली आहेत;

हे सर्व जगाला माहीत करून द्या.

6 सीयोनच्या लोकांनो, मोठ्याने गर्जना करा आणि आनंद गीते गा,

कारण इस्राएलचे महान पवित्र परमेश्वर तुमच्यामध्ये आहेत."