João 2

येशू पाण्याचा द्राक्षारस करतात

1 तिसर्‍या दिवशी गालीलातील काना येथे एक लग्न होते. येशूंची आई तिथे होती, 2 येशू व त्यांच्या शिष्यांना देखील त्या लग्नाचे आमंत्रण होते. 3 ज्यावेळी द्राक्षारस संपला, तेव्हा येशूंची आई त्यांना म्हणाली, "त्यांच्याजवळचा द्राक्षारस संपला आहे."

4 येशू म्हणाले, "बाई,*2:4 बाई मूळ भाषेत स्त्रीसाठी वापरलेला शब्द अनादर करावा म्हणून वापरला नाही. तू मला यामध्ये भाग घ्यावयास का लावते? माझी घटका अजूनही आलेली नाही."

5 त्यांच्या आईने नोकरांस सांगितले, "हा जे काही तुम्हाला सांगेल ते करा."

6 त्या ठिकाणी जवळच पाण्याचे सहा दगडी रांजण होते, ते यहूदीयांच्या शुद्धीकरणासाठी वापरले जात असत आणि त्या प्रत्येकात सुमारे शंभर लीटर पाणी मावत असे.*2:6 अंदाजे 75 ते 115 लीटर क्षमतेचे

7 येशू त्या नोकरांना म्हणाले, "रांजण पाण्याने भरा" त्याप्रमाणे त्यांनी ते पुरेपूर भरले.

8 नंतर येशू त्यांना म्हणाले, "आता यातील काही काढून भोजन प्रमुखाकडे न्या."

त्यांनी तसे केले, 9 त्या भोजन प्रमुखाने द्राक्षारसात परिवर्तित झालेल्या पाण्याची चव पाहिली. तो द्राक्षारस कुठून आणला हे त्याला माहीत नव्हते, पण ज्या नोकरांनी पाणी काढले होते त्यांना माहीत होते. म्हणून त्याने वराला बाजूला बोलावून म्हटले, 10 "प्रत्येकजण उत्तम द्राक्षारस प्रथम वाढतो आणि पाहुणे पिऊन तृप्त झाले की, मग हलक्या प्रतीचा वाढतो; तुम्ही तर उत्तम द्राक्षारस आतापर्यंत ठेवला आहे."

11 येशूंनी गालीलातील काना येथे केलेले हे पहिले चिन्ह होते व त्याद्वारे आपले गौरव प्रकट केले आणि शिष्यांनी त्यांच्यावर विश्वास ठेवला.