लूक 18

येशू आंधळ्यांना दृष्टी देतात

35 येशू यरीहो शहराजवळ आले, तेव्हा एक आंधळा भिकारी, रस्त्याच्या कडेला भीक मागत बसला होता. 36 जवळून जात असलेल्या गर्दीचा आवाज त्याने ऐकला, तेव्हा त्याने विचारले काय चालले आहे. 37 त्यांनी त्याला सांगितले, "नासरेथकर येशू रस्त्याने जात आहेत."

38 तो मोठ्याने ओरडला, "अहो येशू, दावीदाचे पुत्र, माझ्यावर दया करा."

39 येशूंच्या पुढे चाललेल्या गर्दीतील लोकांनी त्याला धमकाविले आणि गप्प बसण्यास सांगितले, पण तो उलट अधिक मोठमोठ्याने ओरडतच राहिला, "अहो दावीदाचे पुत्र, माझ्यावर दया करा."

40 येशू थांबले आणि त्या मनुष्याला त्यांच्याकडे आणण्यास सांगितले. जेव्हा तो आंधळा जवळ आला, येशूंनी त्याला विचारले, 41 "मी तुझ्यासाठी काय करावे अशी तुझी इच्छा आहे?"

"प्रभू मला दृष्टी यावी." त्याने उत्तर दिले.

42 यावर येशू म्हणाले, "ठीक आहे, तुला दृष्टी दिली आहे. तुझ्या विश्वासाने तुला बरे केले आहे." 43 त्याच क्षणाला त्याला दिसू लागले आणि परमेश्वराची स्तुती करीत तो येशूंच्या मागे चालू लागला. जेव्हा सर्व लोकांनी हे पाहिले, त्यांनी सुद्धा परमेश्वराची स्तुती केली.