मत्तय 21

येशू अंजिराच्या झाडाला शाप देतात

18 अगदी पहाटेच ते पुन्हा शहराकडे निघाले. रस्त्यात असताना येशूंना भूक लागली. 19 जवळच त्यांना अंजिराचे झाड दिसले. त्यावर काही अंजीर आहेत काय हे पाहण्यास ते झाडाजवळ गेले. त्या झाडावर त्यांना पानांशिवाय काही आढळले नाही. मग ते त्या झाडाला म्हणाले, "यापुढे तुला फलप्राप्ती होणार नाही." आणि तत्काळ ते झाड वाळून गेले.

20 हे पाहून शिष्य आश्चर्यचकित झाले. त्यांनी येशूंना विचारले, "ते अंजिराचे झाड इतक्या लवकर कसे वाळून गेले?"

21 मग येशूंनी त्यांना म्हटले, "मी तुम्हाला सत्य सांगतो की, तुम्ही संशय न धरता विश्वास ठेवाल, तर जे काही अंजिराच्या झाडाबाबत झाले ते तुम्ही सुद्धा कराल, या डोंगराला ‘ऊठ आणि समुद्रात पड,’ असे तुम्ही म्हणालात, तर ही गोष्ट केली जाईल. 22 तुम्ही विश्वास ठेऊन आणि प्रार्थना करून जे काही मागाल ते तुम्हाला मिळेल."