10 Nikech Hana ne nigi chuny malit noywak ahinya kolamo Jehova Nyasaye. 11 Kendo nokwongʼore kowacho niya, "Yaye Jehova Nyasaye Maratego ka inine masich jatichni kendo ipara ma wiyi ok owil gi jatichni ma imiye wuowi, eka anachiwe ne Jehova Nyasaye e ndalo duto mar ngimane, kendo wembe ok nolielgo wiye."
12 Kaka nomedo lamo Jehova Nyasaye, Eli ne ngʼiye ka nono dhoge. 13 Hana to ne lemo gie chunye to dhoge to ne diemore adiema to dwonde to ok winji. Eli noparo ni omer 14 mi nowachone niya, "Nyaka karangʼo mibiro siko kimer?" We metho.
15 Hana ne odwoke niya, Ok kamano ruodha. An mana dhako man-gi lit ahinya. Ok asebedo kamadho kongʼo kata gik mamero ji, to achiwo chunya ne Jehova Nyasaye. 16 Kik ikaw jatichni ka dhako ma timbege mono. Asebedo kalamo ka nikech chandruok gi kuyona.
17 Eli nodwoke kawachone niya, "Dhi gi kwe, mad Nyasach Israel miyi gima isebedo kikwaye."
18 Hana nowacho niya, "Mad jatichni yud ngʼwono e wangʼi." Eka nodhi e yore owuon mochamo gimoro, kendo wangʼe ne koro onge kuyo.
19 Kinyne gokinyi negichungʼ mine gilemo e nyim Jehova Nyasaye eka negidok dalagi Rama. Elkana nobedo e achiel gi chiege ma Hana eka Jehova Nyasaye nopare. 20 E kindeno Hana nomako ich monywolo wuode. Nochake ni Samuel kowacho niya, "Nikech ne akwaye Jehova Nyasaye."
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)