7 To mwandu mawan-goni watingʼo e agulni mag lowo, mondo oyangre ni teko maduongʼ mawan-goni oa kuom Nyasaye, to ok oa kuomwa wawegi. 8 Pile weche matek olworowa koni gi koni, to ok chunywa ool; wadhier nono, to ok wajogi; 9 isandowa, to ok jwangʼwa; idwaro negwa, to ok tiekwa. 10 Kinde duto wawuotho ka watingʼo tho mar Yesu e ringrewa, mondo eka ngima mar Yesu onere e ringrewa. 11 Wan ma wangima tho ochomowa kinde duto nikech wach Yesu, mondo omi ngima mar Yesu onere e ringrewa matho.