Lucas 22

Petro okwedo Yesu

54 Kane gimake, negidhiyo kode ka gitere ei od jadolo maduongʼ. Petro noluwogi gichien. 55 To kane gisemoko mach e chuny laru kendo gisebedo piny kaachiel, Petro nobedo kodgi. 56 Jatich ma nyako nonene kobedo kanyo kama mach lielie. Nodhi machiegni kode morange matut kendo nowacho niya, "Ngʼatni ne ni kode."

57 To nokwerogo, kowacho niya, "Dhako, ok angʼeye!"

58 Achien bangʼe matin, ngʼat moro nonene kendo nowacho niya, "In bende in achiel kuomgi."

Petro nodwoko niya, "Omera, ok an."

59 Achien bangʼe madirom sa achiel, ngʼat machielo nojiwo kowacho matek niya, "Adier chutho jali ne ni kode, nimar en ja-Galili."

60 Petro nodwoko niya, "Omera, ok angʼeyo gima iwuoyo kuome!" Mana kaka nowuoyono, thuon gweno nokok. 61 Ruoth nolokore kendo nongʼiyo Petro tir. Eka Petro noparo wach mane oyudo Ruoth osewachone niya, "Kapok thuon gweno okok tinendeni, to wangʼ inikweda nyadidek." 62 To nowuok odhiyo oko kendo noywak malit.