Marcos 3

22 Jopuonj Chik mane obiro kanyo koa Jerusalem to nowacho kuom Yesu niya, "Opongʼ gi teko mar Belzebub! Ogolo jochiende gi teko mar ruodh jochiende."

23 To Yesu noluongogi ire mowuoyo kodgi gi ngeche kowacho niya, "Ere kaka Satan digol Satan? 24 Ka pinyruoth moro opogore kendo joge gore kendgi to pinyruodhno ok nyal chungʼ. 25 Bende ka joot achiel opogore to odno nyaka podhi. 26 Ere kaka Satan diked gi pinyruodhe owuon, ka opogore kende owuon to ok dochungʼ, kendo mano ema dibed giko lochne. 27 Chutho onge ngʼat manyalo monjo od ngʼat maratego mi omaye gige odhigo ka ok otweyo ngʼatno mokwongo. Kosetimo kamano eka dohedhre mar yako gik moko e odno. 28 Awachonu adier ni richo kod yanyo Nyasaye ma dhano osetimo nowenegi. 29 To ngʼato angʼata ma yanyo Roho Maler ok nowene richone ngangʼ, nikech oseketho ketho mochwere."

30 Nowacho kamano nikech jogi ne wuoyo kawacho niya, "En gi jachien marach."