Mateus 26

Chenro mar nego Yesu

1 Kane Yesu osetieko wacho wechegi duto, nowachone jopuonjrene niya, 2 "Kaka ungʼeyo, odongʼ ndalo ariyo kende mondo chiengʼ Pasaka ochopi, kendo Wuod Dhano ibiro chiwo mondo ogur."

3 Eka jodolo madongo gi jodong oganda nochokore e dala jadolo maduongʼ, mane nyinge Kaifas, 4 kendo negichano mondo gimak Yesu e yo moro malingʼ-lingʼ mondo ginege. 5 To negiwacho niya, "Kik watim kamano kinde nyasi, nono to ji ogomo."

Owir Yesu Bethania

6 Kane oyudo Yesu ni Bethania e dala ngʼat moro miluongo ni Simon ja-dhoho, 7 dhako moro nobiro ire gi chupa mar alabasta, mopongʼ gi mo mangʼwe ngʼar kendo ma nengone tek, kendo noole duto e wiye sa ma nobet kochiemo e mesa.

8 Ka jopuonjre noneno mano, ne gisin, mi giwacho niya, "Morni iketho malit kayiem nangʼo? 9 Donge morni ne inyalo loke pesa e nengo mamalo mondo omi jodhier pesago."

10 To kaka Yesu nongʼeyo pachgino, nowachonegi niya, "Uchando dhakoni nangʼo? Osetimona gima ber miwuoro. 11 Joma odhier ubiro bedogo kinde duto to an ok ubi siko ka un koda ndalo duto. 12 Kane oolo mo mangʼwe ngʼarno e ringra, notimo kamano mondo oikago ne ik. 13 Awachonu adier ni kamoro amora ma noyalie Injilini e kind ogendini duto mag piny, gima dhakoni otimo bende nohul, kiparego."

Judas oyie ndhogo Yesu

14 Eka achiel kuom ji apar gariyogo, mane iluongo ni Judas Iskariot, nodhi ir jodolo madongo, 15 mopenjogi niya, "Angʼo mubiro miya ka achiwe e lwetu?" Omiyo ne gikwanone pesa mamingli mag fedha piero adek. 16 Chakre chiengʼno kadhi nyime Judas nochako manyo kinde maber mar kete e lwetgi.

Pasaka mar Ruoth

17 Odiechiengʼ mokwongo mar nyasi mar makati ma ok oketie Thowi, jopuonjre nobiro ir Yesu mopenje niya, "Idwaro mondo wadhi waikni kama ichame Pasaka kanye?"

18 Nodwoko niya, "Dhiuru ei dala maduongʼ ir ngʼat moro kendo uwachne ni, ‘Japuonj wacho niya, sana mane ochanna chiegni chopo, omiyo abiro timo nyasi mar Sap Pasaka kod jopuonjrena e odi.’ " 19 Omiyo jopuonjre notimo kaka Yesu nochikogi kendo negiiko Sap Pasaka.

20 Kane ochopo godhiambo, Yesu nobet kachiemo kaachiel gi jopuonjre apar gariyogo. 21 To kane oyudo gichiemo, nowacho niya, "Awachonu adier ni achiel kuomu biro ndhoga."

22 Chunygi nodoko malit ahinya, kendo negichako wachone moro ka moro niya, "Ruoth, dobed an koso?"

23 Yesu nodwokogi niya, "Ngʼat machiemo koda e tawo achiel biro ndhoga. 24 Wuod Dhano biro dhi adier mana kaka nondiki kuome. To ngʼat mandhogo Wuod Dhano none malit! Dine obedo maber moloyo kane ok onywole."

25 Eka Judas, ngʼat mane biro ndhoge nowacho niya, "Rabi, dobed an koso?"

Yesu nodwoko niya, "Ee, en in."

26 Kane oyudo gichiemo, Yesu nokawo makati kendo bangʼ goyo erokamano, nongʼinge momiyo jopuonjrene, kowacho niya, "Kawuru, chamuru; ma en ringra."

27 Bangʼe nokawo kikombe mi ogoyo erokamano bangʼe omiyogi kowacho niya, "Madhuru gima ni e iye, un duto. 28 Ma e remba mar singruok, mochwer ne ji mangʼeny mondo okel warruok kuom richo.