YOWANI 20

Yesu wumonikina Maliya muisi Mangadala

11 Vayi Maliya wutelama ku nganda, va ndambu ziami, wudila ngolo. Bu kaba dila, wuyinama mu ziami, 12 wumona zimbasi zizole zivuata minledi miphembi zivuanda va buangu kioki batula nitu yi Yesu : wumosi wuvuandila ku ndambu kubela ntu, wumosi ku ndambu yibela malu.

13 Zinyuvula :

—A nketo, bila mbi wulembo didila e ?

Maliya wuba vutudila :

—Mu diambu bayibidi nitu yi Pfumu ama, ndikadi zaba kuevi batudidi yawu !

14 Bu katuba bobo, wubaluka ; wumona yesu buna katelimini. Vayi kasia zaba ko ti niandi.

15 Yesu wunyuvula :

—A nketo, bila mbi wulembo didila e ? Nani wuntomba e ?

Maliya kabanzila ti mutu beni wuba kisadi mu ndima yi minti. Buna wunkamba :

—A tata, enati ngeyo wumbongidi, buna wukhamba kuevi wuntudidi muingi ndienda mbongi.

16 Yesu wuntela mbila :

—A Maliya !

Wabaluka ku kaba, wutambudila mu kiebelewo :

—Labuni ; bu dinsundula : "nlongi".

17 Yesu wunkamba :

—Kadi kutsimba, bila ndiyedi ko kuidi Dise diama. Vayi yenda bati bakhomba ziama ayi wuba kamba ti ndieka kuenda kuidi Dise diama ayi Dise dieno ; kuidi Nzambi ama ayi Nzambi eno.

18 Maliya muisi Mangadala wuyenda bata minlonguki ; wuba kamba ti :

—Mbueni Pfumu ayi mawu mama mambu kakhembi.