Marcos 5

Yesu wuviatuka bimbevo ayi lufua mu ngolo

21 Yesu bu kabuela sabuka, mu nlungu, ku disimu dinkaka di mbu ; nkangu wu batu bawombo bayiza kunzungidila vana disimu di mbu. Niandi va ndambu mbu kaba.

22 Buna mutu wumosi dizina diandi Yayilusi*5.22 Yayilusi : Minsekuki minkaka misonika Yayilo va buangu ki Yayilusi. Tala Luka 8.41., wuba wumosi mu bapfumu zi nzo lukutukunu wuyiza vana. Bu kamona Yesu, wufukama va ntualꞌandi. 23 Wunleba ngolo ayi wunkamba :

—Muanꞌama wunketo widi mu ziphasi zi lufua. Wundemvukila ; yizawuntetika mioko muingi kabeluka ayi kazinga !

24 Yesu wuyenda yandi va kimosi ayi nkangu wu batu wunlandakana ayi wumfietikisa mu zindambu zioso. 25 Nketo wumosi wuba muna nkangu beni wuba kimbevo ki viokanga menga, kumi mimvu miodi kabedila kimbevo beni. 26 Wumona ziphasi ziwombo kuidi minganga miwombo ayi bima biandi bioso bimana mu diambu di kimbevo beni, kasia beluka ko vayi ziphasi ziluta buelama. 27 Bu kawa zitsangu zi Yesu, buna wuyiza, muna nkangu wu kaba, ku manima ayi wusimba nledi wu Yesu. 28 Bila wuyindula ti :

—Minu simba kuandi minledi miandi mandi beluka kuama !

29 Muna thangu yina kaka, menga malembolo buela vioka ayi wumona mu nituꞌandi ti belukidi mu nsongo wowo.

30 Muna thangu yina, Yesu wubakula ti lulendo luandi lutotuka, wubaluka kuidi nkangu wu batu ayi wuba yuvula ti :

—A nani simbidi minledi miama e ?

31 Minlonguki miandi minkamba :

—Wummona kuaku buevi nkangu wu batu balembo fietikisila mu zindambu zioso ayi weka buela yuvula : "Nani wutsimbidi e ?"

32 Vayi niandi thalu andi yiba kaka kuidi nkangu muingi kazaba mutu vengi diawu. 33 Nketo wumona boma ayi weka tita. Bu kazaba diambu divangama mu nitu andi buna wufikama, wufukama va ntuala Yesu ayi wunkamba kiedika kioso.

34 Buna Yesu wunkamba :

—A muanꞌama wunketo, minu kiaku kibelusidi ! Yenda mu ndembama ayi beluka kuaku mu ziphasi ziaku.

35 Buna wukidi yoluka, ndambu yi batu baba ku nzo pfumu yi nzolukutukunu bayiza kunkamba :

—Muanꞌaku wunketo fuidi. Bila mbi mu buela tatisa nlongi e ?

36 Vayi Yesu bu kawa mambu batuba, wukamba pfumu yi nzo lukutukunu, ti :

—Kadi mona boma. Wilukila kaka !

37 Bosi Yesu kasia vana ko minsua, kadi kuidi mutu wumosi, mu kunlandakana botula kaka Piela, zaki ayi khombꞌandi Yowani. 38 Buna batula ku nzo Pfumu lukutukunu, Yesu wumona divuda diba kuna : batu badila ayi bayamikina.

39 Buna wukota mu nzo ayi wutuba :

—A bila mbi divuda diodi e ? Ayi bila mbi lulembo didila e ? Muana kasi fua ko vayi leka kuandi kalekidi !

40 Vayi bansekinina. Buna Yesu wutotula batu boso ku nganda. Wubonga dise ayi ngudi yi muana ayi minlonguki miomi miba yandi. Bawu bakota yandi muna khati vinga muba muana beni. 41 Wusimba koko ku muana ayi wunkamba :

—Talita kumi ! Bu dinsundula : Muana ndumba ndikutumina kotuka !

42 Vana vawu muana ndumba wutelama ayi wudiata bila nduka-nduka kumi mimvu miodi miba yandi. Babo basimina ngolo. 43 Vayi Yesu wuba kandika babika kamba mambu beni kadi kuidi mutu wumosi ayi wuba kamba bamvana bidia.