Mateus 18

21 Piela wufikama vaba Yesu, wunyuvula :

—A Pfumu ! Zikhumbu zikua mbeki bu lemvukila khombꞌama wukuphangilanga mambu mambimbi e ? Tsambuadi di zikhumbu kaka e ?

22 Yesu wumvutudila :

—Nana, ndikadi kukamba ti tsambuadi di zikhumbu kaka vayi nate lusambudi lu zikhumbu bunda tsambuadi. 23 Diawu Kipfumu ki Diyilu kidedikini banga ntinu wuzola tanga bima biandi ayi bisadi biandi. 24 Buna katona tanga bima biandi, bannatina kisadi kimosi kiba pholo andi yi kumi di mili di bitalanta*18.24 talanta : kiba mbongo yi sengo. Luvalu luandi luba lu mili sambanu zi denali. Talanta kidedakini mu tezo ki mafunda ma mafunda ma zimbongo.. 25 Vayi bu kasia nunga ko futa ; diawu pfumuꞌandi katumina ti bansumbisa niandi veka ayi nketoꞌandi ayi bana bandi ayi bima biandi bioso muingi pholo andi yifutama. 26 Vayi kisadi beni kifukama va malu mandi ayi kinleba :

"Bika wumvibidila ! Mandifuta pholoꞌaku yoso !"

27 Pfumu wu kisadi kioki wummona kiadi, wunyekula ayi wunlemvukila pholoꞌandi yoso.

28 Kisadi beni bu katotuka, wudengana nkundi andi, muisi kisalu yandi ; wundeva khama yimosi yi zidenali*18.28 denali : yiba mfutu wu kisadi bu kasedi lumbu kimvimba mu ndima.. Niandi wumbuila ayi wumfieta va dinga ayi wunkamba : "futa pholoꞌama".

29 Nkundi andi wu kisalu wufukama ayi wunleba :

"Bika wumvibidila ! Mandifuta pholoꞌku." 30 Vayi wumanga vibidila, wuyenda kunkangisa nate kamanisa futa pholo yoso.

31 Bakundi ba kisalu bankaka bamona kiadi kiwombo bu bamona bu viokila mambu moso. Diawu bayenda kambila pfumu kisalu mambu moso bu mabela. 32 Buna Pfumu beni wutumisa kisadi beni, wunkamba :

"Widi kisadi kimbimbi ! Minu ndilemvukila pholo yoso bila wundeba ngolo. 33 A bila mbi wusi monina ko khombꞌaku kiadi, banga bobo minu ndimueniningi kiadi e ?"

34 Pfumu wufuema buwombo ayi wunyekula mu mioko mi batu bobo banyamisanga batu nate kela manisa futa pholoꞌandi yoso. 35 Buawu bobo buela kuluvangila Dise diama didi ku Diyilu enati kadika mutu mu beno mengi lemvukila khombꞌandi mu ntima wukiedika.