Mateus 26

Bayendila Yesu manenga

1 Yesu bu kamana tuba mambu mama, wukamba minlonguki miandi :

2 —Luzebi ti bilumbu biodi bisiedi muingi nyengo Pasika wutona ; buna bosi Muana Mutu wela yekolo mu vondo va dikulusi !

3 Buna bapfumu banganga Nzambi ayi bakulutu ba batu bakutakana ku nzo Kayife, pfumu yi banganga Nzambi ; 4 bawizana buevi bafueti kangila Yesu mu luvunu muingi bamvonda.

5 Vayi batuba :

—Tubika vanga buawu mu thangu yi nyengo muingi khindu yibika bua mu batu.

Badukudila Yesu malasi ku Betani

6 Yesu bu kaba ku Betani ku nzo Simoni, mutu wowo wuba kimbevo ki buazi, 7 nketo wumosi wuyiza ayi bungu ki malasi ma thalu, wudukula mawu ku ntu wu Yesu mu thangu kaba va meza.

8 Vayi minlonguki mifuema bu mimona bobo ayi mituba :

—Bila mbi mbebosolo yi phila yoyo e ? 9 Nganu mboti mu sumbisa malasi beni mu thalu yiwombo ayi vana zimbongo beni kuidi minsukami.

10 Yesu bu kazaba mayindu mawu, wuba kamba :

—A mbi lulembo monisina nketo wawu phasi e ? Diambu kaphangidi didi diambu dimboti. 11 Minsukami mikala kuandi yeno mu zithangu zioso, vayi minu ndisi kuiza kalanga yeno ko. 12 Enati nketo wawu wundukudidi malasi mama mu nituꞌama, didi mu diambu di kubika nzikuluꞌama. 13 Bukiedika ndikulukamba ti muamo muela longo Nsamu Wumboti wawu va nza yimvimba, diambu divengi nketo wawu diela yolokolongo mu kuntebukilanga moyo.

Yuda wusumbisa Yesu

14 Bosi wumosi mu kumi mimvuala miandi miodi, dizina diandi Yuda Isikalioti, wuyenda kuidi bapfumu zi zinganga Nzambi, 15 wuba yuvula :

—Mbi lulenda kuphana enati ndilusumbisidi Yesu e ? Buna bantangila makumatatu ma bivanzi. 16 Tona muna thangu beni Yuda wutomba diluaku di kuba yekudila Yesu.

Yesu ayi minlonguki miandi badia pasika

17 Mu lumbu kitheti ki nyengo wu mapha makambu tulu luvi*26.17 luvi : Tala Matayi 13.33. minlonguki miyiza kuidi Yesu ayi minyuvula :

—A kuevi tidi tuenda kubikila ndiwulu yi Pasika e ?

18 Wuba vutudila :

—Yendanu ku divula kuidi kingandi, buna lunkamba : "Nlongi kakembi : thanguꞌama yifikimini, ku nzoꞌaku ndindila Pasika ayi minlonguki miama."

19 Minlonguki mivanga phila yi kambila Yesu. Mikubika Pasika.

20 Mu thangu masika, Yesu wuvuanda va meza ayi kumi mimvuala miandi miodi. 21 Mu thangu baba ndia, Yesu wuba kamba :

—Bukiedika ndikulukamba : buna luididi vava mutu wumosi mu beno maka phakusa !

22 Baboso beka mona kiadi, wumosi-wumosi weka kunyuvula :

—Pfumu, buna minu e ?

23 Yesu wuba vutudila :

—Mutu wowo wumbuika koko kuandi va kimosi ayi minu mu dilonga buna niandi wukuphakusa. 24 Bila Muana Mutu wulembo yendi banga busonimina mu Masonoko mu diambu diandi. Vayi nga mabienga kuidi mutu wowo wumvakusa ! Nganu bufueni kuidi mutu beni mu kambu kuandi butuka !

25 Yuda, mutu wowo wukumvakusa, wuyuvula :

—A Nlongi ! Bati minu e !

Bosi Yesu wumvutudila :

—Nyinga, ngeyo tubidi buawu.

26 Thangu baba ndia, Yesu wubonga dipha, wuvutula matondo, wudibukuna bosi wuvana minlonguki miandi, wuba kamba :

—Bonganu ludia, bila yayi yawu nituꞌama !

27 Bosi wubonga mbungu, wuvutula matondo, wuba vana ayi wutuba :

—Bika lunuanu beno boso 28 bila mama mawu menga mama ma Nguizani madukulu mu diambu di ndemvokolo yi masumu ma batu bawombo.