2 राजा 4

एलीसा अऊ सुनेमिन माईलोगन

8 एक दिन एलीसा ह सुनेम नांव के सहर म गीस। उहां एक धनी माईलोगन रिहिस, जऊन ह बिनती करके एलीसा ला जेवन करे बर बलाईस। एकर बाद जब भी ओह ओती आवय, त ओह उहां जेवन करे बर रूकय। 9 ओ माईलोगन ह अपन घरवाला ले कहिस, "सुन, मेंह जानत हंव कि ये मनखे, जऊन ह अकसर हमर एती आथे, ओह परमेसर के एक पबितर जन अय। 10 आ हमन ओकर बर छत म एक छोटे कमरा बना दन, अऊ उहां ओकर बर एक ठन पलंग अऊ एक ठन मेज, एक ठन कुरसी अऊ एक ठन दीया रख देवन। तब जब भी ओह हमर इहां आही, त ओह उहां रूक सकथे।"

11 एक दिन जब एलीसा ह आईस, त ओह ऊपर अपन कमरा म गीस अऊ उहां लेट गीस। 12 ओह अपन सेवक गेहजी ला कहिस, "ओ सुनेमिन ला बला।" त गेहजी ह ओला बलाईस, अऊ सुनेमिन ह आके ओकर आघू म ठाढ़ हो गीस। 13 तब एलीसा ह गेहजी ले कहिस, "ओला कह, ‘तेंह हमर बर ये जम्मो तकलीफ उठाय हस। त तोर बर का करे जावय? का हमन तोर कोनो बात के चरचा राजा या सेनापति ले करन?’ "

ओ माईलोगन ह जबाब दीस, "मोर अपन मनखेमन के बीच एक घर हवय।"

14 एलीसा ह गेहजी ले पुछिस, "त येकर बर का करे जा सकत हे?"

गेहजी ह जबाब दीस, "ओकर कोनो बेटा नइं ए, अऊ ओकर घरवाला ह डोकरा हो गे हवय।"

15 तब एलीसा ह कहिस, "ओला बला।" त गेहजी ह ओला बलाईस, अऊ सुनेमिन ह आके दुवार म ठाढ़ हो गीस। 16 तब एलीसा ह कहिस, "अगले साल लगभग इही समय म तोर कोरा म एक बेटा होही।"

ओ माईलोगन ह कहिस, "नइं, हे मोर मालिक! हे परमेसर के जन, अपन दासी ले लबारी बात झन कह!"

17 पर ओ माईलोगन ह गरभवती होईस, अऊ अगले साल लगभग ओहीच समय म ओह एक बेटा ला जनम दीस, जइसे कि एलीसा ह ओला कहे रिहिस।

18 लइका ह बड़े होवत गीस, अऊ एक दिन ओह बाहिर अपन ददा करा गीस, जऊन ह फसल लुवइयामन के संग रिहिस। 19 अचानक ओह अपन ददा ला कहिस, "आह! मोर मुड़! मोर मुड़!"

ओकर ददा ह अपन एक सेवक ला कहिस, "येला येकर दाई करा ले जा।" 20 ओ सेवक ह ओला उठाके ओकर दाई करा ले गीस; ओ लइका ह मंझन तक अपन दाई के कोरा म बईठे रिहिस, अऊ तब ओह मर गीस। 21 ओ माईलोगन ह लइका ला ऊपर ले जाके परमेसर के जन के दसना म लेटा दीस, अऊ कपाट ला बंद करके उहां ले चल दीस।

22 तब ओह अपन घरवाला करा ये संदेस भिजवाईस, "मोर करा एक सेवक अऊ एक गदही पठो दे ताकि मेंह तुरते परमेसर के जन करा जाके वापिस आ सकंव।"

23 ओकर घरवाला ह पुछिस, "आज तेंह ओकर इहां काबर जाबे? आज न तो नवां चंदा, अऊ न ही बिसराम दिन अय।"

ओह कहिस, "कोनो बात नइं ए।"

24 गदही म काठी बंधवाके ओह अपन सेवक ला कहिस, "गदही ला हांकत चल; अऊ जब तक मेंह तोला नइं कहंव, तब तक धीरे झन चलबे।" 25 ओ माईलोगन ह आघू बढ़त करमेल पहाड़ म परमेसर के जन करा आईस।

जब परमेसर के जन ह ओला दूरिहा ले देखिस, त ओह अपन सेवक गेहजी ला कहिस, "देख! ओती ओ सुनेमिन माईलोगन! 26 ओकर ले मिले बर दऊड़के जा अऊ ओकर ले पुछ, ‘सब बने तो हवय? तोर घरवाला घलो बने तो हवय? अऊ का तोर लइका ह बने तो हवय?’ "

ओ माईलोगन ह कहिस, "हव, सब बने हवय।"

27 जब ओह पहाड़ म परमेसर के जन करा गीस, त ओह ओकर गोड़ ला धर लीस। तब गेहजी ह आके ओला अलग हटाय लगिस, पर परमेसर के जन ह कहिस, "ओला छोंड़ दे! ओकर मन बहुंत बियाकुल हवय, पर यहोवा ह ये बात मोर ले छुपाके रखे हवय, अऊ मोला नइं बताय हवय, कोन जाने काबर?"

28 तब ओ माईलोगन ह कहन लगिस, "हे मोर मालिक, का मेंह तोर ले एक बेटा मांगे रहंय? का मेंह नइं कहे रहंय कि मोर ले लबारी बात झन कह?"

29 एलीसा ह गेहजी ले कहिस, "अपन कनिहां ला कस ले, अऊ मोर लउठी ला अपन हांथ म लेके दऊड़के जा। डहार म कोनो तोला मिलय, त ओकर हालचाल झन पुछबे, अऊ यदि कोनो तोर हालचाल पुछय, त ओकर जबाब झन देबे। अऊ जाके मोर ये लउठी ला ओ लइका के चेहरा म रख देबे।"

30 पर लइका के दाई ह कहिस, "यहोवा के अऊ तोर जिनगी के सपथ, मेंह तोला नइं छोड़ंव।" एकरसेति एलीसा ह उठिस अऊ ओकर पाछू-पाछू गीस।

31 गेहजी ह पहिले हबरके लउठी ला ओ लइका के चेहरा म रखिस, पर कोनो अवाज नइं आईस, अऊ न ही ओमा कोनो हरकत होईस। तब गेहजी ह वापिस आके एलीसा ला कहिस, "लइका ह नइं जागिस।"

32 जब एलीसा ह घर म आईस, त देखिस कि लइका ह ओकर दसना म मरे पड़े हवय। 33 तब ओह भीतर गीस अऊ कपाट ला बंद कर दीस, अऊ भीतर म ओ अऊ मरे पड़े लइका रिहिन। एलीसा ह यहोवा ले पराथना करिस। 34 तब ओह दसना म चढ़के लइका के ऊपर लेट गीस; अपन मुहूं ला लइका के मुहूं ऊपर, अपन आंखी ला लइका के आंखी ऊपर अऊ अपन हांथमन ला लइका के हांथमन ऊपर रखिस। जब ओह ओ लइका ऊपर पसर गीस, त लइका के देहें ह गरम होय लगिस। 35 तब ओह उठके कमरा म एती ले ओती टहले लगिस अऊ तब दसना म जाके एक बार फेर लइका के ऊपर पसर गीस। तब लइका ह सात बार छिंकिस अऊ अपन आंखी ला खोलिस।

36 एलीसा ह गेहजी ला बलाके कहिस, "सुनेमिन ला बला।" अऊ ओह बलाके लानिस। जब सुनेमिन ह आईस, त ओह कहिस, "अपन बेटा ला ले जा।" 37 ओह भीतर आके एलीसा के गोड़ खाल्हे गिरिस अऊ झुकके दंडवत करिस। तब ओह अपन बेटा ला लेके बाहिर चल दीस।