मूसा बर चिनहां
1 मूसा ह जबाब दीस, "मेंह का करहूं यदि ओमन मोर ऊपर बिसवास नइं करहीं या मोर बात ला नइं सुनके ये कहिहीं, ‘यहोवा ह तोला दरसन नइं दे हवय’?"
2 तब यहोवा ह ओला कहिस, "तोर हांथ म का हवय?"
ओह जबाब दीस, "एक ठन लउठी।"
3 यहोवा ह कहिस, "ओला भुइयां म फटिक दे।"
मूसा ह ओला भुइयां म फटिक दीस अऊ ओह एक सांप बन गीस, अऊ मूसा ह भागे लगिस। 4 तब यहोवा ह ओला कहिस, "अपन हांथ बढ़ाके ओकर पुंछी ला धर ले।" तब मूसा ह हांथ बढ़ाके ओ सांप ला धर लीस अऊ ओ सांप ह फेर ओकर हांथ म लउठी बन गीस। 5 यहोवा ह कहिस, "येला देखके ओमन बिसवास करहीं कि यहोवा, ओमन के पुरखामन के परमेसर—अब्राहम के परमेसर, इसहाक के परमेसर अऊ याकूब के परमेसर ह तोला दरसन दे हवय।"