Hebreus 1

परमेसर के आखिरी बचन: ओकर बेटा

1 पहिली जमाना म, परमेसर ह हमर पुरखामन ले, कतको बार अऊ कतको किसम ले अगमजानीमन के दुवारा गोठियाईस, 2 पर ये आखिरी दिन म, ओह हमर ले अपन बेटा के दुवारा गोठियाईस, जऊन ला ओह जम्मो चीज के ऊपर वारिस ठहिराईस अऊ ओकरे दुवारा, ओह संसार ला बनाईस। 3 बेटा ही परमेसर के महिमा के अंजोर ए अऊ ओह परमेसर के रूप के एकदम सही परतिनिधि ए अऊ ओह अपन सामर्थी बचन के दुवारा जम्मो चीजमन ला संभालके रखथे। ओह मनखेमन के पाप ला सुध करे के बाद, स्वरग म महामहिम परमेसर के जेवनी हांथ कोति जा बईठिस। 4 एकरसेति ओह स्वरगदूतमन ले जादा उत्तम ठहिरिस, जइसने कि परमेसर ह ओला स्वरगदूतमन ले उत्तम नांव घलो दे रिहिस।

बेटा ह स्वरगदूतमन ले उत्तम ए

5 काबरकि परमेसर ह कोनो स्वरगदूत ला कभू ये नइं कहिस,

"तेंह मोर बेटा अस;

आज मेंह तोर ददा बन गे हवंव।"*1:5 भजन 2:7

या फेर ये नइं कहिस,

"मेंह ओकर ददा होहूं,

अऊ ओह मोर बेटा होही।"*1:5 2 समू 7:14; 1 इति 17:13

6 पर जब परमेसर ह अपन पहिलांत बेटा ला संसार म लानथे, त कहिथे,

"परमेसर के जम्मो स्वरगदूतमन ओकर अराधना करंय।"

7 स्वरगदूतमन के बारे म परमेसर ह ये कहिथे,

"परमेसर ह अपन स्वरगदूतमन ला आतमा,

अऊ अपन सेवकमन ला आगी के जुवाला बनाथे।"*1:7 भजन 104:4

8 पर बेटा के बारे म ओह कहिथे,

"हे परमेसर, तोर सिंघासन ह सदाकाल तक बने रहिही,

अऊ धरमीपन के राजदंड ह तोर राज के राजदंड होही।

9 तेंह धरमीपन ले मया करय अऊ दुस्टता ले घिन करय;

एकरसेति, परमेसर, तोर परमेसर ह

आनंद के तेल ले तोर अभिसेक करे के दुवारा तोला तोर संगीमन ले ऊपर करे हवय।"*1:9 भजन 45:6, 7

10 ओह ये घलो कहिथे,

"हे परभू, सुरूआत म, तेंह धरती के नीव रखे,

अऊ अकास ह तोर हांथ के दुवारा बनाय गे हवय।

11 ओमन तो नास हो जाहीं, पर तेंह बने रहिबे;

ओमन जम्मो, पहिरे के कपड़ा सहीं जुन्ना हो जाहीं।

12 तेंह ओमन ला चादर सहीं घरियाबे;

कपड़ा के सहीं ओमन बदल दिये जाहीं।

पर तेंह वइसनेच के वइसने रहिथस,

अऊ तोर समय ह कभू अन्त नइं होवय।"*1:12 भजन 102:25-27

13 परमेसर ह कभू कोनो स्वरगदूत ला ये नइं कहिस,

"मोर जेवनी हांथ कोति बईठ,

जब तक कि मेंह तोर बईरीमन ला

तोर गोड़ रखे के चउकी नइं बना देवंव।"*1:13 भजन 110:1

14 का जम्मो स्वरगदूतमन सेवा करइया आतमा नो हंय? हव, ओमन अंय। अऊ ये स्वरगदूतमन ओमन के सेवा करे खातिर पठोय जाथें, जऊन मन उद्धार पाहीं।