1 एकर बाद, यहूदीमन के एक तिहार होईस, जेकर कारन यीसू ह यरूसलेम गीस। 2 यरूसलेम म भेड़ दुवार के लकठा म एक ठन पानी के कुन्ड हवय, जऊन ला इबरानी म बेतहसदा*5:2 कुछू हस्तलिपि म बैतसैदा लिखाय हवय कहिथें। ओकर चारों कोति पांच ठन खुला परछी हवय*5:2 बेतहसदा ये सबद के मतलब होथे दया के घर। 3 ओमा कतको बेमार, अंधरा, खोरवा अऊ लूलवा मनखेमन (पानी के हाले के आसा म) पड़े रहंय। 4 एक ठहिराय समय म परभू के स्वरगदूत ह खाल्हे उतरय अऊ पानी ला हलाय करय। पानी के हालते ही जऊन बिमरहा ह सबले पहिली ओ कुन्ड म उतरे, ओह चंगा हो जावय, चाहे ओकर कोनो भी बेमारी होवय।*5:4 कुछू पुराना हस्तलिपि म ये पद नइं मिलय। 5 उहां एक मनखे रहय, जऊन ह अड़तीस साल ले बेमारी म पड़े रहय। 6 जब यीसू ह ओला उहां पड़े देखिस अऊ ये जानिस कि ओह बहुंत दिन ले ये दसा म हवय, त यीसू ह ओकर ले पुछिस, "का तेंह बने होय बर चाहथस?"

7 ओ बिमरहा मनखे ह यीसू ला कहिस, "हे परभू! मोर करा इहां कोनो नइं ए कि जब पानी ह हलाय जाथे, त मोला कुन्ड म उतारे, अऊ जब मेंह उतरे के कोसिस करथंव, त कोनो आने मोर ले आघू कुन्ड म उतर जाथे।"

8 तब यीसू ह ओला कहिस, "उठ! अपन खटिया ला उठा अऊ रेंग।" 9 तुरते ओ मनखे ह बने हो गीस; ओह अपन खटिया ला उठाईस अऊ चले-फिरे लगिस।

जऊन दिन ये काम होईस, ओह यहूदीमन के बिसराम दिन रिहिस।