33 जब ओमन ओ जगह म आईन, जऊन ला खोपड़ी कहिथें, त उहां ओमन यीसू ला अऊ ओ दू झन बदमास ला अलग-अलग कुरूस ऊपर चघा दीन। एक बदमास ला यीसू के जेवनी कोति अऊ दूसर ला यीसू के डेरी कोति कुरूस ऊपर चघाईन। 34 यीसू ह कहिस, "हे ददा, ये मनखेमन ला माफ कर दे, काबरकि येमन नइं जानथें कि येमन का करत हवंय।" अऊ ओमन चिट्ठी डालके ओकर मुताबिक यीसू के कपड़ा ला अपन म बांट लीन।

35 मनखेमन उहां ठाढ़ होके ये जम्मो ला देखत रिहिन, अऊ अधिकारीमन ये कहिके ओकर हंसी उड़ाईन, "येह आने मन ला बचाईस, अब अपनआप ला बचावय, यदि येह परमेसर के मसीह अऊ चुने हुए जन अय त।"

36 सैनिकमन घलो आईन अऊ ओकर ठट्ठा करिन। ओमन यीसू ला सिरका ला देके कहिन, 37 "अपनआप ला बचा, यदि तेंह यहूदीमन के राजा अस त।"

38 यीसू के कुरूस ऊपर ये लिखाय रहय: "येह यहूदीमन के राजा अय।"

39 जऊन दू झन बदमास उहां कुरूस म लटकाय गे रिहिन, ओमा ले एक झन यीसू के बेजत्ती करत कहिस, "का तेंह मसीह नो हस? त फेर अपनआप ला अऊ हमन ला बचा।"

40 पर आने बदमास ह ओला दबकारके कहिस, "का तेंह परमेसर ले नइं डरस? तेंह घलो तो ओहीच दंड भोगत हवस। 41 हमन सही सजा पावत हन, काबरकि हमन जइसने काम करे हवन, वइसने सजा पावत हन। पर ये मनखे ह कुछू गलती नइं करे हवय।"

42 तब ओह यीसू ला कहिस, "हे यीसू, जब तेंह अपन राज म आबे, त मोला सुरता करबे।"

43 यीसू ह ओला कहिस, "मेंह तोला सच कहथंव कि आजेच तेंह मोर संग स्वरग-लोक म होबे।"