लूका 3

यूहन्ना बतिसमा देवइया डहार तियार करथे

1 महाराजा तिबिरयुस के सासन के पंदरहवां बछर म, जब पुन्तियुस पीलातुस यहूदिया प्रदेस के राजपाल रिहिस; हेरोदेस ह गलील के राजपाल; ओकर भाई फिलिप्पुस ह इतूरिया अऊ त्रखोनितिस के राजपाल; अऊ लिसानियास ह अबिलेने के राजपाल रिहिस; 2 अऊ हन्ना अऊ काइफा महा पुरोहित रिहिन। तब ओ समय परमेसर के बचन ह निरजन जगह म जकरयाह के बेटा यूहन्ना करा पहुंचिस। 3 यूहन्ना ह यरदन नदी के आसपास के जम्मो इलाका म गीस अऊ पाप के छेमा खातिर मन-फिराय के बतिसमा के परचार करत रिहिस। 4 जइसने कि यसायाह अगमजानी के किताब म लिखे हवय:

"सुनसान जगह म एक झन अवाज देवत रिहिस,

‘परभू बर डहार ला तियार करव,

ओकर डहार ला सीधा करव।

5 हर एक घाटी ला पाट दिये जाही,

अऊ हर एक पहाड़ अऊ पहाड़ी ला नीचे करे जाही।

टेड़गा सड़कमन सीधा

अऊ खंचवा-डीपरा रसतामन समतल हो जाहीं।

6 अऊ जम्मो मनखेमन परमेसर के उद्धार ला देखहीं।’ "*3:6 यसा 40:3-5

7 मनखेमन के भीड़ के भीड़ यूहन्ना ले बतिसमा ले बर आवत रिहिस। त यूहन्ना ह ओमन ला कहिस, "हे जहरिला सांप के पीलामन हो! तुमन ला कोन ह चेता दीस कि तुमन परमेसर के अवइया कोरोध ले भागव? 8 अपन काम के दुवारा देखावव कि पाप ले पछतावा करे हवव। अऊ अपन मन म ये बात झन सोचव कि तुमन अब्राहम के संतान अव। मेंह तुमन ला बतावत हंव कि ये पथरामन ले परमेसर ह अब्राहम बर संतान पईदा कर सकथे। 9 टंगिया ला पहिले ही रूखमन के जरी म रखे जा चुके हवय, अऊ जऊन रूख म बने फर नइं फरय, ओह काटे अऊ आगी म झोंके जाही।"

10 तब भीड़ के मनखेमन ओकर ले पुछिन, "त हमन ला का करना चाही।"

11 यूहन्ना ह जबाब दीस, "जेकर करा दू ठन कुरता हवय, ओह अपन एक कुरता ओला दे देवय, जेकर करा एको ठन नइं ए, अऊ जेकर करा भोजन हवय, ओह घलो भूखहामन संग अइसनेच करय।"

12 लगान लेवइयामन घलो बतिसमा लेय बर आईन अऊ ओमन यूहन्ना ले पुछिन, "हे गुरू, हमन ला का करना चाही?"

13 ओह ओमन ला कहिस, "जतकी ठहिराय गे हवय, ओकर ले जादा लगान झन लेवव।"

14 तब कुछू सैनिकमन ओकर ले पुछिन, "अऊ हमन ला का करना चाही?"

ओह ओमन ला कहिस, "काकरो ले जबरदस्ती पईसा झन लेवव अऊ न मनखेमन ऊपर लबारी दोस लगावव। अपन तनखा म संतोस करव।"

15 मनखेमन आस लगाय बाट जोहत रिहिन अऊ जम्मो झन अपन मन म सोचत रिहिन कि कहूं यूहन्ना ह तो मसीह नो हय। 16 यूहन्ना ह ओ जम्मो झन ला कहिस, "मेंह तुमन ला पानी ले बतिसमा देवत हंव। पर एक झन आवत हवय, जऊन ह मोर ले अऊ सक्तिसाली ए। मेंह तो ये लईक घलो नो हंव कि ओकर पनही के बंधना ला खोलंव। ओह तुमन ला पबितर आतमा अऊ आगी ले बतिसमा दीही। 17 ओकर सूपा ह ओकर हांथ म हवय ताकि अपन कोठार ला साफ करय अऊ गहूं ला अपन कोठा म कुढ़ोवय, पर ओह भूंसा ला ओ आगी म बारही, जऊन ह कभू नइं बुतावय।" 18 अऊ बहुंते आने बचन के दुवारा यूहन्ना ह मनखेमन ला उत्साहित करिस अऊ ओमन ला सुघर संदेस के परचार करिस।

19 यूहन्ना ह हेरोदेस राजा ला डांटिस काबरकि ओह अपन भाई के घरवाली हेरोदियास ला रखे रिहिस अऊ बहुंते आने कुकरम करे रिहिस। 20 तब हेरोदेस ह अपन जम्मो कुकरम म एक कुकरम अऊ जोड़ लीस कि ओह यूहन्ना ला पकड़के जेल म डार दीस।

यीसू के बतिसमा अऊ बंसावली

21 जम्मो मनखेमन बतिसमा लेवत रिहिन, त यीसू ह घलो बतिसमा लीस। अऊ जब ओह पराथना करत रहय, त अकास ह खुल गीस। 22 अऊ पबितर आतमा ह देहें के रूप म एक पंड़की सहीं ओकर ऊपर उतरिस, अऊ स्वरग ले ये अवाज आईस: "तेंह मोर मयारू बेटा अस। तोर ले मेंह बहुंत खुस हवंव।"

23 जब यीसू ह अपन सेवा के काम ला सुरू करिस, त ओह करीब तीस साल के रिहिस। जइसने कि मनखेमन समझत रिहिन, ओह यूसुफ के बेटा रिहिस,

अऊ यूसुफ ह हेली के बेटा, 24 हेली ह मत्तात के बेटा,

मत्तात ह लेवी के बेटा, लेवी ह मलकी के बेटा,

मलकी ह यन्नाई के बेटा, यन्नाई ह यूसुफ के बेटा,

25 यूसुफ ह मत्ततियाह के बेटा, मत्ततियाह ह आमोस के बेटा,

आमोस ह नहूम के बेटा, नहूम ह एसली के बेटा,

एसली ह नोगह के बेटा, 26 नोगह ह मात के बेटा,

मात ह मत्ततियाह के बेटा, मत्ततियाह ह सिमी के बेटा,

सिमी ह योसेख के बेटा, योसेख ह योदाह के बेटा,

27 योदाह ह योनान के बेटा, योनान ह रेसा के बेटा,

रेसा ह जरूब्बाबेल के बेटा, जरूब्बाबेल ह सालतीएल के बेटा,

सालतीएल ह नेरी के बेटा, 28 नेरी ह मलकी के बेटा,

मलकी ह अद्दी के बेटा, अद्दी ह कोसाम के बेटा,

कोसाम ह इलमोदाम के बेटा, इलमोदाम ह एर के बेटा,

29 एर ह यहोसू के बेटा, यहोसू ह एलिएजेर के बेटा,

एलिएजेर ह योरीम के बेटा, योरीम ह मत्तात के बेटा,

मत्तात ह लेवी के बेटा, 30 लेवी ह सिमोन के बेटा,

सिमोन ह यहूदा के बेटा, यहूदा ह यूसुफ के बेटा,

यूसुफ ह योनाम के बेटा, योनाम ह एलयाकीम के बेटा,

31 एलयाकीम ह मलेआह के बेटा, मलेआह ह मिन्नाह के बेटा,

मिन्नाह ह मत्तता के बेटा, मत्तता ह नातान के बेटा,

नातान ह दाऊद के बेटा, 32 दाऊद ह यिसै के बेटा,

यिसै ह ओबेद के बेटा, ओबेद ह बोअज के बेटा,

बोअज ह सलमोन के बेटा, सलमोन ह नहसोन के बेटा,

33 नहसोन ह अम्मीनादाब के बेटा, अम्मीनादाब ह अरनी*3:33 या राम के बेटा,

अरनी ह हेसरोन के बेटा, हेसरोन ह पेरेस के बेटा,

पेरेस ह यहूदा के बेटा, 34 यहूदा ह याकूब के बेटा,

याकूब ह इसहाक के बेटा, इसहाक ह अब्राहम के बेटा,

अब्राहम ह तेरह के बेटा, तेरह ह नाहोर के बेटा,

35 नाहोर ह सरूग के बेटा, सरूग ह रू के बेटा,

रू ह फिलिग के बेटा, फिलिग ह एबेर के बेटा,

एबेर ह सेलह के बेटा, 36 सेलह ह केनान के बेटा,

केनान ह अर्पछद के बेटा, अर्पछद ह सेम के बेटा,

सेम ह नूह के बेटा, नूह ह लेमेक के बेटा,

37 लेमेक ह मतूसेलह के बेटा, मतूसेलह ह हनोक के बेटा,

हनोक ह येरेद के बेटा, येरेद ह महललेल के बेटा,

महललेल ह केनान के बेटा, 38 केनान ह एनोस के बेटा,

एनोस ह सेत के बेटा, सेत ह आदम के बेटा,

अऊ आदम ह परमेसर के बेटा रिहिस।