लूका 8

यीसू ह आंधी ला सांत करथे

22 एक दिन यीसू ह अपन चेलामन ला कहिस, "आवव, हमन झील के ओ पार चलन।" तब ओमन डोंगा म चघिन अऊ जाय लगिन। 23 जब ओमन डोंगा ला खेवत रिहिन, त यीसू ह सुत भुलाईस। तब झील के ऊपर एक आंधी चलिस, अऊ डोंगा ह पानी ले भरे लगिस, अऊ ओमन बड़े जोखिम म पड़ गीन।

24 चेलामन यीसू करा गीन अऊ ओला उठाके कहिन, "मालिक, मालिक, हमन पानी म बुड़इया हवन।"

यीसू ह उठिस, अऊ आंधी अऊ उफनत पानी ला दबकारिस। ओमन थम गीन अऊ जम्मो ह सांत हो गीस। 25 तब यीसू ह अपन चेलामन ले कहिस, "तुम्हर बिसवास ह कहां हवय?"

ओमन म डर हमा गे अऊ अचम्भो करके एक-दूसर ला कहिन, "येह कोन ए? येह आंधी अऊ पानी ला घलो हुकूम देथे अऊ ओमन एकर हुकूम मानथें।"

यीसू ह परेत आतमा के धरे एक मनखे ला बने करथे

26 ओमन डोंगा ला खेवत गिरासेनीमन के इलाका म हबरिन, जऊन ह झील के ओ पार, गलील के उल्टा दिग म हवय।