43 अऊ उहां एक झन माईलोगन रहय, जऊन ला बारह बछर ले लहू बहे के बेमारी रिहिस,*8:43 बहुंते हस्तलिपि म अऊ अपन जम्मो जमा-पूंजी ला बईदमन ऊपर खरचा कर दे रिहिस पर ओला कोनो बईद बने नइं कर सके रिहिन। 44 ओह यीसू के पाछू ले आईस अऊ ओकर कपड़ा के छोर ला छुईस, अऊ तुरते ओकर लहू बहई बंद हो गीस।

45 यीसू ह पुछिस, "मोला कोन ह छुईस?" जब ओ जम्मो झन इनकार करिन, तब पतरस ह कहिस, "हे मालिक, मनखेमन के भीड़ तोर चारों कोति हवय अऊ तोर ऊपर गिरे पड़त हवय।"

46 पर यीसू ह कहिस, "कोनो मोला छुए हवय, काबरकि मेंह जानत हंव कि मोर म ले सामर्थ निकले हवय।"

47 जब ओ माईलोगन ह देखिस कि ओह छिपे नइं रह सकय, तब ओह कांपत आईस अऊ यीसू के गोड़ खाल्हे गिरिस। अऊ जम्मो मनखेमन के आघू म ओह कारन बताईस कि काबर ओह यीसू ला छुईस अऊ कइसने ओह तुरते चंगा हो गीस। 48 तब यीसू ह ओला कहिस, "बेटी, तोर बिसवास ह तोला ठीक करे हवय। सांति म जा।"