1 मेंह ओ मनखे अंव, जऊन ह यहोवा के कोप के

छड़ी के दुवारा पीरा ला देखे हवंव।

2 ओह मोला भगा दे हवय

अऊ मोला अंजोर के बदले अंधियार म चलाय हवय;

3 वास्तव म, ओह बार-बार, दिन भर

अपन हांथ ला मोर बिरूध उठाय हवय।

4 ओह मोर चमड़ी अऊ मोर मांस ला झुर्रीदार कर दे हवय

अऊ मोर हाड़ामन ला टोर दे हवय।

5 ओह करूवाहट अऊ कठिन समय के संग

मोर ऊपर टूट पड़े हे अऊ मोला घेर ले हवय।

6 ओह बहुंत पहिले मरे मनखे सहीं

मोला अंधियार म रहे बर छोंड़ दे हवय।

7 ओह मोला दीवार ले घेर दे हवय ताकि में भाग झन सकंव;

ओह मोला भारी बेड़ी ले बांध रखे हे।

8 अऊ त अऊ जब मेंह मदद बर पुकारथंव या गोहारथंव,

त ओह मोर पराथना ला नइं सुनय।

9 ओह गढ़े गय पथरामन ले मोर रसता ला रोक दे हवय;

ओह मोर रसतामन ला टेढ़ा-मेड़ा कर दे हवय।

10 जइसे भालू ह सिकार के इंतजार म लेटे रहिथे,

जइसे सिंह ह सिकार के इंतजार म छुपे रहिथे,

11 ओह मोला रसता ले घसीटके कुटा-कुटा कर दे हवय

अऊ मोला बिगर मदद के छोंड़ दे हवय।

12 ओह अपन धनुस ला ताने हवय

अऊ मोला अपन तीर के निसाना बनाय हवय।

13 अपन तरकस के तीरमन ले

ओह मोर हिरदय ला छेद दीस।

14 मेंह अपन जम्मो मनखेमन बर हंसी के पात्र बन गे हंव;

ओमन गीत के दुवारा दिन भर मोर हंसी उड़ाथें।

15 ओह मोला करू पान ले भर दे हवय

ओह मोला पीये बर पित्त दे हवय।

16 ओह कंकड़ ले मोर दांतमन ला टोर दे हवय;

ओह धुर्रा म मोला कुचर दे हवय।

17 मोर जिनगी ले सांति छीन लेय गे हवय;

मेंह भुला गे हंव कि उन्नति का ए।

18 एकरसेति मेंह कहिथंव, "मोर सोभा ह

अऊ यहोवा ले मेंह जऊन आसा करत रहेंव, ओह चले गीस।"

19 मेंह अपन पीरा अऊ एती-ओती भटके के बात,

करूवाहट अऊ पित्त ला सुरता करथंव।

20 मेंह ओमन ला बने करके सुरता करथंव,

अऊ मोर मनोबल ह मोर भीतर म ही गिरत जात हे।

21 तभो ले मेंह ये सुरता करथंव

अऊ एकरे कारन मोला आसा हवय:

22 यहोवा के महान मया के कारन हमन खतम नइं होयेंन,

काबरकि ओकर दया हमेसा बने रहिथे।

23 हर बिहनियां ओमन नवां होथें;

महान ए तोर बिसवासयोग्यता।

24 मेंह अपनआप ले कहिथंव, "यहोवा ह मोर भाग ए;

एकरे कारन मेंह ओकर ऊपर आसा रखहूं।"

25 यहोवा ह ओमन बर बने अय, जऊन मन ओकर ऊपर आसा रखथें,

जऊन मन ओकर खोज म रहिथें;

26 यहोवा के उद्धार बर

चुपेचाप इंतजार करई ह बने बात ए।

27 एक मनखे बर अपन जवानी के समय

जुड़ा उठाना बने बात ए।

28 ओह चुपेचाप अकेला बईठे रहय,

काबरकि यहोवा ह ये जुड़ा ला ओकर ऊपर डाले हवय।

29 ओह अपन चेहरा ला धुर्रा म तोपय—

येमा अभी भी आसा हो सकथे।

30 ओह अपन गाल ला ओकर कोति करय, जऊन ह ओला तमाचा मारे चाहथे,

अऊ ओह बहुंत कलंकित होवय।

31 काबरकि परभू ह कोनो ला

हमेसा बर नइं तियागे।

32 हालाकि ओह दुख लानथे, पर ओह करूना करही,

अइसे महान ए, ओकर न टूटनेवाला मया।

33 काबरकि ओह मन से काकरो ऊपर

दुख या पीरा नइं लानय।

34 देस के जम्मो कैदीमन ला

गोड़ तरी कुचरई,

35 सर्वोच्च परमेसर के आघू म

मनखेमन ला ओमन के अधिकार ले वंचित करई,

36 अऊ ओमन ला नियाय ले वंचित करई—

अइसन चीजमन ला परभू ह नइं देख सकय?

37 यदि परभू ह हुकूम नइं दे हवय,

त कोन ए ओ, जऊन ह अपन कहे बात ला पूरा कर सकथे?

38 बिपत्ति अऊ बने बात,

का ये दूनों सर्वोच्च परमेसर के हुकूम ले नइं आवंय?

39 जीयत मनखे ला काबर सिकायत करना चाही

जब ओला ओकर पाप के सजा मिलथे?

40 आवव, हमन अपन चालचलन ला जांचन अऊ परखन,

अऊ आवव, हमन यहोवा करा लहुंट आवन।

41 आवव, हमन अपन हिरदय अऊ अपन हांथमन ला

स्वरग के परमेसर कोति उठावन अऊ ये कहन:

42 "हमन पाप अऊ बिदरोह करे हन

अऊ तेंह हमन ला छेमा नइं करे हस।

43 "तेंह कोरोध ले भरके हमर पीछा करय;

तेंह बिगर दया के मनखेमन ला जान से मारे हस।

44 तेंह अपनआप ला बादर ले ढांप ले हस

ताकि कोनो पराथना तोर करा झन हबरे।

45 तेंह हमन ला जाति-जाति के मनखेमन के बीच म

मईला अऊ अनाथ बना दे हस।

46 "हमर जम्मो बईरीमन हमर बिरूध म

बहुंत कुछू कहत हें।

47 हमन आतंक अऊ संकट,

बिनास अऊ बरबादी झेलत हन।"

48 मोर आंखीमन ले आंसू के धार बहत हे

काबरकि मोर मनखेमन नास होवत हें।

49 मोर आंखीमन ले आंसू ह

बिगर कोनो अराम के लगातार बहते रहिही,

50 जब तक कि स्वरग ले यहोवा ह

खाल्हे नइं देखही।

51 मोर सहर के जम्मो माईलोगनमन के कारन

जऊन कुछू मेंह देखथंव, ओकर से मोर मन ला दुख लगथे।

52 जऊन मन बिगर कारन के मोर बईरी हो गे रिहिन

ओमन चिरई सहीं मोर सिकार करिन।

53 ओमन मोला खंचवा म डारके मोर परान लेय के कोसिस करिन

अऊ मोर ऊपर पथरा फेंकिन;

54 पानी ह मोर मुड़ ऊपर तक आ गीस,

अऊ मेंह सोचेंव कि में नास होनेचवाला हंव।

55 हे यहोवा, गहिला खंचवा ले,

मेंह तोर नांव ला पुकारेंव।

56 तेंह मोर बिनती ला सुने: "मदद बर मोर पुकार के सेति

अपन कान ला बंद झन कर।"

57 जब मेंह तोला बलांय, त तेंह मोर लकठा म आय,

अऊ तेंह कहे, "झन डर।"

58 हे परभू, तेंह मोर मामला ला अपन हांथ म लेय;

अऊ तेंह मोर जिनगी ला बचाय।

59 हे यहोवा, जऊन अनियाय मोर ऊपर करे गीस, ओला तेंह देखे हस।

मोर मामला ला संभाल!

60 ओमन जऊन बदला लीन अऊ मोर बिरूध करे गे

ओमन के जम्मो सडयंत्र ला तेंह देखे हस।

61 हे यहोवा, ओमन के दुवारा करे गे बेजत्ती

अऊ मोर बिरूध करे गे जम्मो सडयंत्र के बारे तेंह सुने हस—

62 मोर बईरीमन मोर बिरूध म दिन भर,

का कानाफूसी करथें अऊ बड़बड़ाथें।

63 ओमन ला देख! उठत या बईठत,

ओमन अपन गीत म मोर हंसी उड़ाथें।

64 हे यहोवा, ओमन के काम के मुताबिक,

जऊन दुस्ट काम ओमन अपन हांथ ले करे हवंय, ओकर बदला ले।

65 ओमन के हिरदय ऊपर एक परदा डाल दे,

अऊ तोर सराप ओमन ला लगे!

66 हे यहोवा, अकास के खाल्हे ले

कोरोध म ओमन के पीछा कर अऊ ओमन ला नास कर दे।