Marcos 6

यीसू ह पांच हजार मनखेमन ला खाना खवाथे

30 प्रेरितमन लहुंटके यीसू करा जूरिन अऊ जऊन कुछू ओमन करे अऊ सिखोय रिहिन, ओ जम्मो बात ओला बताईन। 31 तब ओह ओमन ला कहिस, "चलव, कोनो सुनसान ठऊर म चलके थोरकन सुरता लेवव।" काबरकि अब्बड़ मनखेमन आवत-जावत रिहिन, अऊ ओमन ला खाय के मऊका घलो नइं मिलत रिहिस।

32 एकरसेति ओमन डोंगा म चघके एक ठन सुनसान जगह म चल दीन। 33 ओमन ला जावत देखके, कतको झन ओमन ला चिन डारिन अऊ झील के तीरे-तीर दऊड़िन अऊ आघू हबरके उहां ओमन ले मिलिन। 34 जब यीसू डोंगा ले उतरिस अऊ मनखेमन के एक बड़े भीड़ ला देखिस, त ओला ओमन के ऊपर तरस आईस, काबरकि ओमन बिगर चरवाहा के भेड़मन सहीं रिहिन अऊ ओह ओमन ला बहुंत अकन बात सिखोवन लगिस।

35 जब बेरा ह ढरक गीस, तब ओकर चेलामन ओकर करा आके कहिन, "येह एक सुनसान जगह ए अऊ बेरा ह बहुंत ढरक गे हवय। 36 मनखेमन ला भेज ताकि ओमन आसपास के गांव अऊ बस्तीमन म जाके अपन खाय बर कुछू बिसा सकंय।"

37 पर यीसू ह जबाब दीस, "तुमन ओमन ला कुछू खाय बर देवव।"

ओमन ओला कहिन, "अतेक मनखे ला खवाय बर, एक मनखे के छै महिना ले जादा के बनी*6:37 यूनानी म लगभग दू सौ दीनार लगही। का हमन जाके, येमन के खाय बर अतेक जादा पईसा खरचा करन?"

38 ओह ओमन ला कहिस, "जाके देखव कि तुम्हर करा कतेक रोटी हवय?"

ओमन पता लगाके कहिन, "पांच ठन रोटी अऊ दू ठन मछरी।"

39 तब यीसू ह ओमन ला हुकूम दीस कि जम्मो झन ला हरियर कांदी ऊपर ओरी-ओरी करके बईठा देवव। 40 ओमन सौ-सौ अऊ पचास-पचास के ओरी-ओरी करके बईठ गीन। 41 तब ओह पांचों रोटी अऊ दूनों मछरी ला लीस अऊ स्वरग कोति देखके परमेसर ला धनबाद दीस अऊ रोटी ला टोर-टोरके अपन चेलामन ला देवत गीस कि ओमन मनखेमन ला परोसंय अऊ दूनों मछरी ला घलो मनखेमन म बांट दीस। 42 ओ जम्मो झन खाईन अऊ खाके अघा गीन। 43 चेलामन बांचे-खुचे रोटी अऊ मछरी के टुकड़ा के बारह टुकना भर के उठाईन। 44 खवइयामन म उहां पांच हजार आदमीमन रिहिन।