मत्ती 21

यीसू ह अंजीर के रूख ला सराप देथे

18 बड़े बिहनियां, जब यीसू ह सहर ला वापिस जावत रिहिस, त ओला भूख लगिस। 19 सड़क के तीर म एक ठन अंजीर के रूख ला देखके, ओह उहां गीस, पर ओला पान के छोंड़ ओमा अऊ कुछू नइं मिलिस। तब यीसू ह ओ रूख ला कहिस, "अब ले तोर म फेर कभू फर झन लगय।" अऊ तुरते ओ अंजीर के रूख ह सूख गीस।

20 जब चेलामन येला देखिन, त ओमन अचम्भो करिन अऊ कहिन, "अंजीर के रूख ह तुरते कइसने सूख गीस?"

21 यीसू ह ओमन ला जबाब दीस, "मेंह तुमन ला सच कहत हंव, यदि तुमन बिसवास करव अऊ संका झन करव, त तुमन न सिरिप अइसने करहू, जइसने मेंह ये अंजीर के रूख के संग करे हवंव, पर यदि तुमन ये पहाड़ ले कहिहू, ‘जा अऊ समुंदर म गिर जा।’ अऊ येह हो जाही। 22 यदि तुमन बिसवास करथव, त जऊन कुछू तुमन पराथना म मांगव, ओह तुमन ला मिल जाही।"