31 "ये दूनों बेटा म ले कोन ह अपन ददा के ईछा ला पूरा करिस?"
ओमन कहिन, "पहिला ह।"
यीसू ह ओमन ला कहिस, "मेंह तुमन ला सच कहत हंव कि लगान लेवइया अऊ बेस्यामन तुम्हर ले आघू परमेसर के राज म जावत हवंय। 32 काबरकि यूहन्ना ह तुमन ला धरमीपन के रसता देखाय बर आईस, अऊ तुमन ओकर ऊपर बिसवास नइं करेव, पर लगान लेवइया अऊ बेस्यामन ओकर ऊपर बिसवास करिन। येला देखे के बाद घलो, तुमन पछताप नइं करेव अऊ न ही ओकर ऊपर बिसवास करेव।
दुस्ट किसानमन के पटंतर
(मरकुस 12:1-12; लूका 20:9-19)