27 यीसू ह उहां ले आघू बढ़िस, त दू झन अंधरा मनखे ये गोहार पारत ओकर पाछू हो लीन, "हे दाऊद के संतान, हमर ऊपर दया कर।"

28 जब यीसू ह घर के भीतर गीस, त ओ अंधरा मनखेमन ओकर करा आईन। यीसू ह ओमन ले पुछिस, "का तुमन ला बिसवास हवय कि मेंह ये काम कर सकत हंव?"

ओमन ओला कहिन, "हव परभू।"

29 तब यीसू ह ओमन के आंखी ला छुईस अऊ कहिस, "तुम्हर बिसवास के मुताबिक तुम्हर बर होवय।" 30 अऊ ओमन के आंखीमन देखे लगिन। यीसू ह ओमन ला बहुंत चेताके कहिस, "देखव, ये बात ला अऊ कोनो ला झन बतावव।" 31 पर बाहिर निकलके, ओमन ओ जम्मो इलाका म यीसू के जस ला फईला दीन।