1 तब ओ जम्मो इसरायली मनखेमन एक मन होके, जल-दुवार के आघू के चऊक म जमा होईन। ओमन कानून के गुरू, एजरा ला मूसा के कानून के किताब ला बाहिर लाने बर कहिन, जेमा यहोवा ह इसरायल ला हुकूम देय रिहिस।

2 तब एजरा पुरोहित सातवां महिना के पहिला दिन कानून के किताब ला सभा के आघू म लानिस; ओ सभा म आदमी अऊ माईलोगन अऊ ओ जम्मो मनखेमन रिहिन, जेमन सुनके समझ सकत रिहिन। 3 ओह कानून के किताब ला बिहनियां ले लेके मंझनियां तक चऊक कोति मुहूं करके जल-दुवार के आघू म आदमी, माईलोगन अऊ ओ जम्मो झन ला पढ़के सुनाईस, जेमन समझ सकत रिहिन। अऊ जम्मो मनखेमन धियान लगाके कानून के किताब ला सुनिन।

4 कानून के गुरू, एजरा ह लकरी के एक ऊंच मंच म ठाढ़ होईस, जेला ओहीच मऊका बर बनाय गे रिहिस। ओकर जेवनी कोति मत्तितियाह, सेमा, अनायाह, उरियाह, हिलकियाह अऊ मासेयाह; अऊ ओकर डेरी कोति पदायाह, मिसाएल, मलकियाह, हासूम, हसबद्दानाह, जकरयाह अऊ मसुल्लाम ठाढ़े रिहिन।

5 एजरा ह किताब ला खोलिस। जम्मो झन ओला देख सकत रिहिन, काबरकि ओह ओमन ले ऊंचहा जगह म ठाढ़े रिहिस; अऊ जब ओह किताब ला खोलिस, तब जम्मो मनखेमन उठके ठाढ़ हो गीन। 6 एजरा ह यहोवा, महान परमेसर के इस्तुति करिस; अऊ जम्मो मनखेमन हांथ उठाके कहिन, "आमीन! आमीन!" तब ओमन मुड़ नवाके अपन माथा भुइयां म टेकाईन अऊ यहोवा के अराधना करिन।

7 जब मनखेमन उहां खड़े रिहिन, त लेवीमन—येहोसू, बानी, सेरेबियाह, यामीन, अक्कूब, सब्बतै, होदियाह, मासेयाह, कलीता, अजरयाह, योजाबाद, हानान अऊ पलायाह—मनखेमन ला कानून के बातमन ला समझाईन। 8 ओमन परमेसर के कानून के किताब ले पढ़िन अऊ ओकर अनुवाद करत मतलब घलो बतात गीन, जेकर ले मनखेमन पढ़े गय भाग ला समझंय घलो।

9 तब राजपाल नहेमियाह, एजरा पुरोहित अऊ कानून के गुरू, अऊ ओ लेवी, जेमन मनखेमन ला समझावत रिहिन, ओमन जम्मो मनखेमन ले कहिन, "आज के दिन ह यहोवा तुम्हर परमेसर बर पबितर दिन अय। एकरसेति सोक झन मनावव या झन रोवव।" काबरकि जम्मो मनखेमन कानून के बचन ला सुनके रोवत रहंय।

10 नहेमियाह ह ओमन ले कहिस, "जावव अऊ अपन पसंद के खाना खावव अऊ मीठा रस पीके आनंद मनावव, अऊ जेमन रांधे नइं हवंय, ओमन बर कुछू जेवन पठोवव। आज के दिन ह हमर परभू बर पबितर दिन अय। दुखी झन होवव, काबरकि यहोवा के आनंद ह तुम्हर बल अय।"

11 लेवीमन जम्मो मनखेमन ला ये कहिके चुप कराईन, "सांत रहव, काबरकि आज एक पबितर दिन अय। दुखी झन होवव।"

12 तब जम्मो मनखेमन खाय-पीये बर, आने मन ला कुछू जेवन पठोय बर अऊ आनंद मनाय बर चले गीन, काबरकि जऊन बचन ओमन ला बताय गे रिहिस, ओला ओमन समझ गे रिहिन।

13 सातवां महिना के दूसर दिन, परिवारमन के मुखियामन, पुरोहित अऊ लेवीमन के संग कानून के बचन ऊपर धियान करे बर एजरा गुरू के चारों कोति फेर जूर गीन। 14 ओमन ला ओ कानून म लिखाय ये बात मिलिस, जेला यहोवा ह मूसा के जरिये हुकूम देय रिहिस कि इसरायलीमन सातवां महिना के तिहार के बेरा कुंदरामन म रहंय*8:14 देखव लैव्य 23:42 15 अऊ ओमन अपन जम्मो नगरमन म अऊ यरूसलेम म ये बचन के घोसना करंय: "पहाड़ी इलाका म जावव अऊ जैतून अऊ जंगली जैतून रूखमन ले, अऊ मेंहदी, खजूर अऊ घना रूखमन के डारामन ला लानके ओमन ले कुंदरा बनावव" जइसने कि लिखाय हवय।*8:15 देखव लैव्य 23:37-40

16 एकरसेति मनखेमन बाहिर जाके डारामन ला ले आईन अऊ अपन घर के छानी म, अऊ अपन अंगनामन म, अऊ परमेसर के भवन के अंगना म, अऊ जल-दुवार के लकठा के चऊक म कुंदरामन ला बनाईन अऊ एक ठन कुंदरा एपरैम के दुवार के लकठा म घलो बनाईन। 17 ओ पूरा दल के मनखे, जेमन बंधुवई ले वापिस लहुंटके आय रिहिन, ओमन कुंदरामन ला बनाके ओमा निवास करिन। नून के बेटा यहोसू के दिन ले लेके ओ दिन तक इसरायलीमन अइसने उत्सव नइं मनाय रिहिन। अऊ ओमन बहुंत आनंदित होईन।

18 पहिले दिन ले लेके आखिरी दिन तक, एजरा ह हर दिन परमेसर के कानून के किताब ले पढ़-पढ़के सुनाईस। ओमन सात दिन तक तिहार मानिन, अऊ आठवां दिन, नियम के मुताबिक एक महासभा होईस।