1 अह च़िठी आसा मंऐं पल़सी लिखी दी। हुंह आसा परमेशरे मरज़ी दी मसीहो शधाणूं हणां लै छ़ांटअ द। मुंह संघै आसा इधी मेरअ साथी विश्वासी भाई सोस्थिनेस बी ज़ुंण मेरी मज़त करा।

2 हुंह लिखा ऐहा च़िठी करिन्थ नगरी मसीहा दी विश्वास करनै आल़ी टोली लै, ज़ुंण परमेशरै हाम्हां संघै मसीहा ईशू दी एक करी आपणीं परज़ा हणां लै ज़ुदै किऐ अर तेऊ आप्पू लै आसा शादै दै कि तिंयां पबित्र होए। परमेशरै किऐ तम्हैं पबित्र ज़िहअ तेऊ हर ज़ैगा सोभी लोगा लै किअ ज़ुंण प्रभू ईशू मसीहा दी विश्वास करा ज़ुंण हाम्हां सोभिओ प्रभू आसा।

3 म्हारै बाब परमेशर अर प्रभू ईशू मसीहा का आसा मेरी एही अरज़ कि तम्हां सोभी लोल़ी झींण अर शांती सदा हुई।

4 हुंह करा थारै बारै कबल्‍लअ आपणैं परमेशरो शूकर, किल्हैकि परमेशरै दैनअ मसीहा ईशू करै तम्हां लै जश। 5 मसीहा संघै एक हणैं पिछ़ू दैनी परमेशरै तम्हां लै एही बर्गत कि तम्हां लै दैनी तेऊ तिंयां सोभै च़िज़ा ज़ेते तम्हां ज़रुरत ती। मतलब इहै आत्मिक दान कि तम्हैं होरी का परमेशरो समाद खोज़ी सके। होर दैनी तेऊ तम्हां लै एही बुध कि परमेशरे गल्‍ला समझ़ी सके। 6 ईंयां खास दान ज़ुंण परमेशरै तम्हां लै दैनै एता करै हुई तम्हां दी अह गल्‍ल पाक्‍की कि मसीहे बारै अह समाद आसा शुचअ।

7 ऐबै ज़िहै तम्हैं सोभै म्हारै प्रभू ईशू फिरी एछदै न्हैल़ै आसा लागै दै, तम्हां का आसा सोभै आत्मिक बरदान ज़ेता पबित्र आत्मां विश्वासी लै दैआ। 8 परमेशरा डाहणैं तम्हैं खिरी तैणीं विश्वासा दी पाक्‍कै बी, ताकि तम्हां दी तैहा धैल़ी किछ़ै खोट निं शुझिए ज़ेभै म्हारअ प्रभू ईशू पृथूई लै फिरी एछणअ। 9 परमेशरा करनअ इहअ, सह करा तिहअ ई ज़िहअ सह बोला किल्हैकि सह आसा शुचअ-पाक्‍कअ। तेऊ आसा हाम्हैं आपणैं पूता संघै एक हणां लै शादै दै ज़ुंण म्हारअ प्रभू ईशू मसीहा आसा।✝

10 भाईओ, हुंह करा तम्हां का प्रभू ईशू मसीहे नाओंऐं अरज़ कि तम्हैं सोभै डाहा आप्पू मांझ़ै सोभै कठा रही एक मन्‍न अर एक मकसद। 11 किल्हैकि ए मेरै भाईओ, खलोए होरी टबरै खोज़अ मुखा कि तम्हां मांझ़ै आसा लागै दै झ़गल़ै हंदै।

12 मेरै बोल़णैंओ मतलब आसा इहअ कि तम्हां मांझ़ै कोऐ, बोला आप्पू लै, "हाम्हैं आसा पल़सीए च़ेल्‍लै," कोऐ बोला, "हाम्हैं आसा अपूलोसे च़ेल्‍लै," कोऐ बोला, "हाम्हैं आसा कैफा शधाणूंए च़ेल्‍लै," कोऐ खोज़ा, "हाम्हैं आसा मसीहे।" 13 ईंयां एही गल्‍ला निं विश्वास करनै आल़ै लै ठीक आथी मसीहा निं इहअ दला दी बांडदअ। थारी तैणीं कै पल़सी पाअ क्रूसा दी मारी? तम्हां लै कै पल़सीए नाओंआं दी आसा पाणीं दी डुबकी दैनी दी?

14 हुंह करा परमेशरो शूकर कि भाई क्रिस्पुस अर गयुसा छ़ाडी निं मंऐं तम्हां मांझ़ै होरी कोही लै आथी पाणीं दी डुबकी दैनी दी। 15 किधी इहअ निं हआ कि कोऐ बोले तम्हां लै इहअ कि तम्हां आसा मेरै च़ेल्‍लै हणां लै पाणीं दी डुबकी भेटी दी। 16 हाँ, मुंह आसा एही आद कि मंऐं आसा स्तिफनुसे घअरा आल़ै लै बी पाणीं दी डुबकी दैनी दी, इना का लाऊआ निं मुंह आद आथी कि मंऐं कहा होरी लै बी आसा होए पाणींए दी डुबकी दैनी दी।

17 प्रभू ईशू मसीहा निं हुंह डुबकी दैंदअ आथी छ़ाडअ द, पर हुंह आसा खुशीए समादा खोज़दअ छ़ाडअ द। ज़ेभै हुंह खुशीओ समाद खोज़ा, हुंह निं तेथ मणछा ज़ेही मिठी अर च़लाकी आल़ी गल्‍ला राल़दअ कि लोग मेरी शुणें। ज़ै हुंह इहअ करे, लोगा करनअ मेरी मिठी गल्‍ला दी विश्वास अर तिन्‍नां का निं मसीहे क्रूसा दी मौते शगतीओ थोघ लागणअ।

18 ज़ेभै लोग मसीहे क्रूसा दी मरने बारै समाद शूणां, तिन्‍नां मांझ़ै बोला कई इहअ कि मसीहो अह समाद आसा ऐडी गल्‍ल, ज़ुंण इहअ सोठा तिंयां आसा लागै दै जम्परी बाखा हांढदै। पर हाम्हैं ज़ुंण तेऊ समादा दी विश्वास करा, अह आसा परमेशरे बात ज़ेथ परमेशर लोगा आपणीं शगती करै बच़ाऊआ। 19 किल्हैकि पबित्र शास्त्रा दी आसा लिखअ द,✝

"मुंह करनी अह गल्‍ल प्रगट कि

एऊ संसारे मणछे आसा अह ऐडी सोठ

ज़ुंण इहअ समझ़ा कि तिंयां आसा समझ़कार।

मुंह रहैऊंणीं अह गल्‍ल कि तिंयां निं सोभै समझ़कार आथी।"

20 हाम्हां एछा एता करै एही समझ़ कि ज़ुंण आप्पू अक्ली आल़ै फिरा तिन्‍नें अक्ल आसा बृथा। ज़ुंण खास्सै पहल़ै दै शास्त्री एऊ संसारै गल्‍ला करने ज़ाणकार आसा तिन्‍नें बी निं किछ़ै किम्मत आथी। परमेशरै किई अह गल्‍ल प्रगट कि ज़ुंण अक्ल इधी एऊ संसारै आसा, तेते निं तेऊ संघै किछ़ै किम्मत आथी।✝

21 किल्हैकि परमेशर आसा खास्सअ समझ़कार तेऊ का आसा थोघ कि संसारे मणछ निं आपणीं समझ़ अर ज्ञैना करै तेऊ सेटा पुजी सकदै। तैही खोल्ही परमेशरै खुशीए समादा करै मणछा बच़ाऊंणे एक होर बात, ज़ेऊ खुशीए समादा हाम्हैं खोज़ा, च़ाऐ विश्वास नांईं करनै आल़ै एता लै ऐडी गल्‍ल किल्है निं समझ़े।

22 अह ज़ाण्हिंआं यहूदी लै ऐडी गल्‍ल किल्हैकि तिंयां च़ाहा एता शुचै साबत करना लै स्वर्गो नछ़ैण भाल़णअ अर होरी ज़ातीए लोग हआ मणछे ज्ञैना लोल़ै लागै दै। 23 पर हाम्हैं खोज़ा ऐहा गल्‍ला कि मसीहा मूंअ क्रूसा दी म्हारै पापा का हाम्हां बच़ाऊंणा लै, ज़ेता पिछ़ू यहूदी ठोहल़ लागी* अर होरी ज़ाती लै आसा ऐडी गल्‍ल।

24 पर ज़ुंण तेऊ आप्पू सेटा लै आसा शादै दै, च़ाऐ यहूदी, च़ाऐ यूनानी, तिन्‍नां लै आसा अह ई मसीहा परमेशरो ज्ञैन अर शगती। 25 किल्हैकि परमेशरे आसा ऐडी गल्‍ल भिई संसारे ज्ञैनी शास्त्री का खास्सी, अर परमेशरे कमज़ोरी बी आसा मणछे ज़ोरा का बी खास्सी।

26 भाईओ, आपणैं बारै सोठा तधू थारी ज़िन्दगी केही ती ज़धू तम्हैं परमेशरै शादै। मणछे समझ़े साबै नांईं तै तधू तम्हां मांझ़ै कई समझ़कार आथी, नां तम्हां मांझ़ै सोभै मशूर आथी तै अर नां तम्हां मांझ़ै कुंण राज़ै-माहा राज़ेए खिंबा का आथी तै। 27 पर परमेशरै छ़ांटै तिंयां लोग ज़हा अह संसार ऐडै समझ़ा ताकि तिंयां तिन्‍नां मणछा शर्मिंदै करे ज़ुंण आप्पू समझ़कार समझ़ा। ज़ुंण लोग कमज़ोर आसा परमेशरै छ़ांटै तिंयां कि सह तिन्‍नां शर्मिंदै करे ज़ुंण शगती आल़ै आसा।

28 परमेशरै छ़ांटै तिंयां मणछ ज़हा अह संसार निक्‍कै अर बृथा समझ़ा ताकि सह तेता बरैबाद करे ज़ेता संसार खास समझ़ा। 29 परमेशरै किअ इहअ एते तैणीं कि तेऊ सम्हनै कोहै घमंड नां करी सके।

30 पर परमेशरै किऐ तम्हैं मसीहा ईशू संघै एक अर मसीहा बाती दैआ सह हाम्हां लै आपणीं अक्ल। परमेशर बणाआं हाम्हां आप्पू संघै धर्मीं बी। मसीहा ईशू करै आसा हाम्हैं पबित्र बणाऐं दै अर सह दैआ हाम्हां लै म्हारै पापा का छ़ुटकारअ।✝

31 मसीहा आसा हाम्हां लै सोभ किछ़, ज़िहअ पबित्र शास्त्रा दी आसा लिखअ द, "ज़ै कहा घमंड करनअ, सह करे सिधअ तेता दी घमंड ज़ुंण प्रभू किअ।"✝