1 ऐबै भाईओ, ज़ुंण तम्हैं मुखा आत्मिक बरदाने बारै सुआल पुछ़अ त, हुंह च़ाहा इहअ कि तम्हां लोल़ी तेते बारै राम्बल़ै करै थोघ लागअ। 2 तम्हां का आसा थोघ कि विश्वासा दी एछणैं का आजी तम्हैं केही ज़िन्दगी ज़िऊआ तै, तधू करा तै तम्हैं बी तिन्‍नां कांणी अर टौणीं मुहुर्ती सेटा तिहअ ई ज़िहअ तम्हां लै होर करना लै बोला तै।✝

3 तै च़ाहा हुंह कि तम्हां का लोल़ी थोघ लागअ कि ज़ुंण परमेशरे आत्में साबै बोला, सह निं इहअ बोल्दअ, "ईशू आसा फिटक लागअ द" अर नां पबित्र आत्मां बाझ़ी कुंण इहअ बोली सकदअ, "ईशू आसा प्रभू।"

4 आत्मिक बरदान, आसा कई रंगे, पर पबित्र आत्मां आसा एक्‍कै सोभिओ मूल़। 5 काम बी आसा कई रंगे ज़ुंण हाम्हैं प्रभू लै करा अर हाम्हैं करा एकी ई प्रभूए च़ाकरी। 6 परमेशर दैआ हाम्हां मांझ़ै हरेकी लै होरी-होरी रंगे काम करना लै, पर सह परमेशर आसा एक्‍कै ई ज़ुंण हाम्हां सोभी बाती काम करा।

7 परमेशरै आसा हाम्हां सोभी लै किज़ै नां किज़ै गूण सह रहैऊआ हाम्हां का कि पबित्र आत्मां आसा हाम्हां संघै ताकि हाम्हैं आपणैं साथी विश्वासी भाईए मज़त करी सके। 8 परमेशरे आत्मां एकी मणछा लै इहअ प्रच़ार करनैओ गूण ज़ेथ अक्लीए गल्‍ला आसा अर सह ई आत्मां दैआ दुजै मणछा लै इहअ प्रच़ार करनैओ गूण ज़ेथ खास्सअ ज्ञैन आसा।

9 कोई लै दैआ पबित्र आत्मां मसीहा दी पाक्‍कअ विश्वास डाहणेंओ गूण अर दुजै मणछा लै दैआ सह ई आत्मां बमार मणछा ठीक करनैओ बरदान। 10 पबित्र आत्मां दैआ एकी मणछा लै च़मत्कार करने शगती अर दुजै लै दैआ परमेशरो समाद खोज़णेंओ बरदान अर एकी होरी लै दैआ ऐहा गल्‍ला परखणैंओ बरदान कि ज़ुंण बरदान आसा, सह पबित्र आत्मां बाखा आसा कि कदुष्ट आत्मां बाखा आसा? कोई लै दैआ सह कई रंगे भाषा-बोली बोल़णैंओ बरदान ज़ुंण तेऊ कधि निं होए शिखल़ी दी, अर कोई लै दैआ सह तैहा भाषा-बोलीओ मतलब खोज़णेंओ बरदान ज़ुंण तेऊ कधि निं शिखल़ी।

11 ईंयां सोभै बरदान आसा एकी ई पबित्र आत्में काम। पबित्र आत्मां दैआ हर विश्वासी लै बरदान ज़िहअ पबित्र आत्मां दैणअ च़ाहा।

12 किल्हैकि ज़ेही देही एक आसा अर तेते आंग हआ कई, पर तैहा देहीए कई आंग हई बी आसा सह सारी देही मिली करै एक्‍कै ई देही, अर तिहअ ई आसा मसीहा बी एक्‍कै। 13 किल्हैकि हाम्हैं सोभ, कै यहूदी कै होरी ज़ातीए, कै गलाम कै आज़ाद, हाम्हैं आसा एकी ई आत्मां अर देही संघै डुबकी लई दी अर हाम्हां सोभी लै आसा एक्‍कै ई पबित्र आत्मां दैनी दी ज़िहअ हाम्हैं एकी प्रिहअ का झुटा।

14 एते तैणीं कि देही दी निं सिधअ एक्‍कै आंग आथी, तेथ आसा कई आंग। 15 ज़ै खूर इहअ बोले, "हुंह निं हाथ आथी, तै निं हुंह ऐहा देहीओ आथी," तै कै सह सच्च़ी निं आथी तैहा देहीओ? 16 ज़ै कान इहअ बोले, "हुंह निं आछ आथी अर तै निं हुंह देहीओ आथी," सह कै इहअ करै सच्च़ी निं आथी तैहा देहीओ? 17 ज़ै सारी देही आछ हंदी तै शुणनअ किधा का थिअ? ज़ै सारी देही कान ई हंदअ तै शिंघणअ किधा का?

18 पर सच्च़ी आसा परमेशरै आपणीं मरज़ी दी सोभै आंग देही ठीक ज़ैगा डाहै दै। 19 ज़ै सह एक्‍कै ई आंग हंदअ, सह निं तै देही हणीं ती। 20 पर ऐबै आंग; खास्सै आसा, पर देही आसा एक्‍कै ई। 21 आछ निं हाथा लै बोली सकदी, "मुंह निं तेरी ज़रुरत आथी" अर नां मूंड खूरा लै सकदअ बोली, "मुंह निं थारी ज़रुरत आथी।"

22 पर देहीए तिंयां आंग ज़ुंण होरी का दुबल़ै ज़ाण्हिंआं तिंयां आसा बडै ज़रूरी। 23 देहीए ज़हा आंगा हाम्हैं नकदरै समझ़ा, तिन्‍नां ई आंगै करा हाम्हैं सोभी का खास्सी इज़त अर म्हारै ज़ुंण आंग शोभा निं दैंदै, तिंयां हआ होर भिई शोभलै, 24 पर तैबी निं म्हारै इना शोभलै आंगा किछ़ै मतलब आथी। पर परमेशरै दैनी देही एही बणाईं कि ज़हा आंगा अदरे कामीं ती, तेऊ आंगा भेटी होर बी खास्सी इज़त।

25 परमेशरै किअ इहअ एते तैणीं कि देही दी निं फूट लोल़ी पल़ी, अर ताकि तिंयां एकी दुजे हेर-सभाल़ करदै रहे। 26 तैही आसा ज़ै एकी आंगा दाह लागी, तेते दाह उझ़िआ देहीए सोभी आंगा, अर ज़ै एकी आंगा खुशी भेटी, तिंयां होर आंग बी मनाऊंआं तेते खुशी।

27 इहअ ई करै तम्हैं सोभ आसा कठा मिली करै मसीहे देही, अर तम्हैं सोभै आसा तैहा देहीए आंग। 28 मसीहे देही दी आसा परमेशरै टोली दी हाम्हां लै ज़ुदै-ज़ुदै काम दैनै दै, पैहलअ आसा शधाणूं,

दुजअ आसा परमेशरो गूर,

चिअ आसा सखाऊंणै आल़अ,

तेखअ शगतीए कामां करनै आल़अ,

नरोगै करनै आल़अ,

झींण करनै आल़अ,

इंतज़ामा करनै आल़अ,

कई रंगे बोली बोल़णैं आल़अ।

29 हाम्हां मांझ़ै निं सोभै शधाणूं आथी? नां हाम्हैं सोभै परमेशरे गूर आथी? नां हाम्हां मांझ़ै सोभै गूरू आथी? नां सोभै शगतीए काम करी सकदै? 30 नां हाम्हां सोभी रोगा नरोगै करनैओ बरदान आथी भेटअ द? नां हाम्हैं सोभै खास बोली-भाषा सकदै बोली?

31 नां हाम्हैं सोभै होरी भाषा दी तेतो मतलब खोज़ी सकदै। तम्हैं लोल़ी सोभी का खास्सी मज़त करनै आल़अ बरदान मांगअ।

पर हुंह खोज़ूं तम्हां का इना मांझ़ै सोभी का बित्तअ किज़ै आसा।